Presidenti i Serbisë, Aleksandar Vuçiq, ka thënë sot se nuk ka pritur asgjë nga bisedimet Kosovë-Serbi në Bruksel, por se çdo progres ka qenë i mirë. Ai tha se i vlerëson si të arsyeshme mesazhet e BE-së për zbatimin e marrëveshjes për Asociacionin.
I pyetur se çfarë pret nga bisedimet e sotme në Bruksel, nëse do të sjellin ndryshim në dialog, Vuçiq tha se Beogradi është gjithmonë i gatshëm për bisedime dhe se ato janë gjithmonë më të mira se kur nuk flasin.
“Duke pasur parasysh entuziazmin e liderëve shqiptarë, nuk mund të presësh asgjë”, tha ai.
Presidenti serb e vlerësoi thirrjen e BE-së për respektimin e marrëveshjes për Asociacionin si mesazh të mirë, racional dhe të arsyeshëm. Megjithatë, ai tha se mungon një veprim konkret.
