Ambasadori i Italisë në Kosovë, Antonello De Riu, ka thënë se shteti i tij mbështet fuqimisht dialogun Kosovë-Serbi, derisa marrëveshjen përfundimtare e ka parë si mundësi historike që t’i jepet fund, siç e cilëson ai, trashëgiminë tragjike të së kaluarës.
De Riu këto deklarata i ka dhënë përgjatë një interviste me agjencinë italiane të lajmeve ‘Anza’, teksa ka folur edhe për raportet Kosovë-Itali, të cilat ai i cilëson të shkëlqyera, përcjell lajmi.net.
“Italia, së bashku me partnerët e tjerë (Franca, Gjermania, Britania e Madhe dhe SHBA), është gati të inkurajojë të dyja palët që të punojnë në mënyrë konstruktive nën lehtësimin e BE-së që të arrihet një marrëveshje vendimtare për stabilizimin e rajonit dhe përspektivën europiane”, potencoi më tej De Riu.
Ambasadori italian poashtu theksoi edhe përmirësimin e bashkëpunimit në fushën ekonomike.
“Sigurisht, sektori ekonomik është sektori ku bashkëpunimi ynë shënon perspektiva më interesante të rritjes. Ekziston edhe mundësia që investitorët italianë të fokusohen në tregun kosovar, i cili paraqet komplementaritete interesante me ekonominë tonë”, deklaroi ai.
Ai po ashtu foli edhe për prezencën ushtarake italiane në kuadër të KFOR-it.
“Në konfirmim të vlerës strategjike që i kemi rezervuar këtij misioni dhe kontributit të tij në stabilizimin e Ballkanit Perëndimor, nga vjeshta e ardhshme Italia do të shprehë sërish pozicionin e komandantit”, deklaroi ndër të tjera ambasadori italian. /Lajmi.net/
