Vendet e Ballkanit Perëndimor, të cilat kanë harmonizuar plotësisht politikat e tyre ndaj Rusisë me politikat e Bashkimit Evropian, mund të ftohen më shpesh në takime të nivelit evropian (BE).
Sipas një dokumenti pune që është debatuar sot nga ministrat e jashtëm të BE përfaqësuesit e Shqipërisë, Malit të Zi, Maqedonisë së Veriut mund të ftohen në takimet e zgjedhura të Këshillit të BE dhe organeve përgatitore të Këshillit për politikën e jashtme.
Në dokument përmenden edhe “opsionet e ndryshme për angazhim të zgjeruar politik me këto vende”.
Krerët e diplomacisë evropiane diskutuan situatën në Ballkanin Perëndimor në një takim të rregullt, atyre në diskutimin joformal iu bashkuan edhe kolegë nga vendet e rajonit.
Sipas burimeve të REL nga takimi, disa ministra të jashtëm të vendeve anëtare të BE-së kanë kërkuar që Serbia të vendosë sanksione ndaj Rusisë.
Para takimit, Ministrja e Jashtme gjermane Annalena Baerbock përsëriti nevojën që të gjithë partnerët e Ballkanit Perëndimor t’i bashkohen sanksioneve të Unionit duke thënë se kjo është thelbësore “jo vetëm për sa i përket vlerave të përbashkëta, por edhe për çështjet me rëndësi strategjike”.
Në dokumentin e punës, i cili ka qenë objekt i diskutimit të ministrave të BE-së, dhe të cilin Radio Evropa e Lirë e ka parë, thuhet se Serbia pritet të deklarohet për zgjedhjen e saj strategjike.
“Serbia pritet të mos lërë asnjë dyshim në zgjedhjen e saj strategjike për integrimin evropian dhe përkushtimin ndaj vlerave të BE-së në mënyrë që të përparojë në rrugën drejt anëtarësimit në BE”. Nevojitet një angazhim i plotë për reformat e përshpejtuara në lidhje me BE-në, veçanërisht në fushën e sundimit të ligjit. “Serbia është çelësi për stabilitetin dhe sigurinë në rajon,” thuhet në dokument.
Ndryshe Ministrja e Jashtme e Gjermanisë, Annalena Baerbock, ka folur për dialogun Kosovë -Serbi para takimit të ministrave duke thënë se thënë se dy vendet duhet përkrahur në procesin e normalizimit të marrëdhënieve.
“Është rruga që ato duhet bërë së bashku për të mbajtur perspektivën evropiane”, ka thënë Baerbock, në një prononcim për media para takimit të ministrave të Jashtëm të BE-së në Bruksel.
