Zyrtarët e Bashkimit Evropian deklaruan se janë në kontakt me autoritetet izraelite për listimin e 6 organizatave joqeveritare palestineze nga Izraeli në listën terroriste dhe se presin sqarimin e çështjes, transmeton Anadolu Agency (AA).

Një nga zëdhënësit e Komisionit Evropian, Peter Stano në konferencën e përditshme për media tha se 2 nga 6 organizatat e të drejtave të njeriut janë të përfshira në listë që përfitojnë nga fondet e BE-së.

Duke thënë se po hetojnë seriozisht akuzat e bëra në lidhje me organizatat, Stano tha se “Ne jemi në kontakt me autoritetet izraelite për të sqaruar çështjen”.

Ai theksoi se fondet e BE-së dhe mbështetja e tyre për palestinezët janë një element i rëndësishëm i zgjidhjes me dy shtete të çështjes izraelito-palestineze.

Qeveria izraelite më 23 tetor njoftoi se kishte listuar si organizata terroriste 6 organizata palestineze për të drejtat e njeriut, të cilat pretendon se janë të lidhura me Frontin Popullor për Çlirimin e Palestinës (PFLP).

Sipas lajmit të “Jerusalem Post” të Izraelit, Ministria izraelite e Drejtësisë shpalli si të paligjshme organizatat: Agjencia për Mbrojtjen e të Burgosurve Zamir, Ligji për të Drejtat e Njeriut El-Hak, Qendra e Kërkimit dhe Zhvillimit Bisan, Rrjeti i Mbrojtjes së të Burgosurve Palestinezë Samidun, Shoqata e Komisioneve Punuese Bujqësore dhe Dega Palestineze e Lëvizjes Ndërkombëtare për të Drejtat e Fëmijëve.