“Gëzimi ynë i Bajramit është i përzier me pikëllim. Plot 29 vite, nga dita në ditë kërkojmë të dashurit tanë në pyje dhe përrenj, duke i nxjerrë nga gropat dhe varret masive”, tha Reisi, Kavazoviç.
Sot, pas faljes së namazit të xhenazes u bë varrimi i 25-të kolektiv për 12 viktimat e luftës në Bosnjë e Hercegovinë në Qendrën Memoriale Kamiçani në Kozarac afër Prijedorit, eshtrat e të cilëve u zhvarrosën nga disa varre masive, raporton Anadolu Agency (AA).
Para varrimit, familjet e viktimave të Prijedorit i dhanë lamtumirën e fundit të dashurve ndërsa në varrimin kolektiv morën pjesë një numër i madh i qytetarëve dhe zyrtarëve.
Instituti për Personat e Zhdukur në BeH deklaroi se viktimat u vranë në vitin 1992 ndërsa eshtrat e tyre u zhvarrosën në të kaluarën nga varret masive në Shkëmbinjtë e Koriçanit, Tomashiç, Hrastova Glavica si dhe në vendet Kozarac – Garevci dhe Jablanica – Prosara.
Viktima më e re e varrosur sot është Fikret Maroshliç, i cili kishte 21-vjeç kur u vra dhe eshtrat e tij u zhvarrosën nga varri masiv në Shkëmbinjtë e Koriçanit. Së bashku me Fikretin, u varros edhe babai i tij Himzo Maroshliç, i cili ishte 47-vjeç kur u vra. Eshtrat e tij u zhvarrosën gjithashtu nga varri masiv në Shkëmbinjtë e Koriçanit. Ai është viktima më e vjetër e varrosur këtë vit.
Përveç tyre, u varrosën Emin (Hasan) Çoraliç, i lindur në 1950; Vasif (Mahmut) Mujkanoviç 1960; Rifet (Abid) Kahrimanoviç 1959; Sakib (Mustafa) Deniç, 1958; Hasib (Hasan) Behliç 1950, Mirsa (Shefik) Brdar, 1963, Ismet (Husein) Hirkiç 1950, Idriz (Eshef) Duraçak 1954, Nexhad (Adem) Fazliç 1959 dhe Samir (Rizvo) Merxhiç 1970.
Namazin e xhenazes e fali Reis-ul-Ulemaja i Bashkësisë Islame në Bosnjë e Hercegovinë, Hussein ef. Kavazoviç, i cili gjatë adresimit tha se në Kozarac për të 29-tën herë pas vitit të rëndë 1992 përjetojnë një dhimbje planetare.
“Gëzimi ynë i Bajramit është i përzier me pikëllim. Plot 29 vite, nga dita në ditë kërkojmë të dashurit tanë në pyje dhe përrenj, duke i nxjerrë nga gropat dhe varret masive me shpresën se do të gjejmë trupat e tyre ose të paktën një pjesë të trupave të tyre dhe t’i varrosim ashtu si i ngjan njeriut. Kanë kaluar plot 29 vjet dhe ne ende falim namazin e xhenazes dhe vetëm Zoti i dashur e di sa kohë do të shkojë para se t’i varrosim të gjithë. Deri në vëllezërit tanë të fundit, burrat, motra, nënat, ne t’i lëshojmë në tokën e Bosnjës. Mijëra të tjerë presin t’u falet namazi i xhenazes dhe të kenë varrin dhe nishanin e tyre”, tha Kavazoviç.
Ai tha se kriminelët “jo vetëm që vranë fëmijët tanë, prindërit dhe familjet, por gjatë gjithë kohës ata po përpiqen të fshehin trupat e viktimave, në mënyrë që të mbulojnë gjurmët e tyre, para nesh, por edhe para botës”.
“Mallkuar qoftë në të dy botërat ai që njeh vrasësin dhe nuk dëshiron të dëshmojë kundër tij në emër të të vrarëve”, tha Kavazoviç.