Në një deklaratë të Ministrisë së Jashtme të vendit thuhet se vendi mirëpriti Ghanin dhe familjen e tij në “baza humanitare”
Emiratet e Bashkuara Arabe (EBA) konfirmuan se kanë pranuar ish-presidentin e Afganistanit, Ashraf Ghani, si dhe familjen e tij, transmeton Anadolu Agency (AA).
Në një deklaratë të Ministrisë së Jashtme të vendit thuhet se vendi mirëpriti Ghanin në “baza humanitare”.
Më herët, mediat afgane raportuan se EBA i ofruan Ghanit një vendbanim pas “arratisjes” së tij.
Kryeqyteti Kabul ra në duart e talebanëve pasi qeveria afgane u rrëzua pas përparimeve marramendëse të talebanëve që e shtynë Ghanin të largohej nga vendi.
Kishte skena paniku dhe kaosi në aeroportin e Kabulit të hënën, teksa banorët e dëshpëruar u përpoqën të iknin nga vendi i shkatërruar nga lufta. Disa vdekje u raportuan pasi disa u kapën në avionët që fluturonin jashtë kryeqytetit.
Këtë pranverë, lufta midis talebanëve dhe forcave afgane u intensifikua pasi trupat e huaja njoftuan tërheqjen e tyre nga vendi deri më 11 shtator, në 20 vjetorin e sulmeve terroriste që çuan në pushtimin amerikan të vendit.
Me rënien e qeverisë afgane, vëmendja po kthehet në garantimin e sigurisë për civilët dhe personat që presin të evakuohen, si dhe një transferim i rregullt i pushtetit.
Talebanët kanë deklaruar se lufta në Afganistan ka mbaruar dhe thanë se janë duke u zhvilluar përpjekjet për të formuar një qeveri përfshirëse.