Presidenti i Turqisë dhe ai i Çadit diskutuan marrëdhëniet dypalëshe dhe çështjet rajonale në Ankara
Turqia është e përgatitur të forcojë bashkëpunimin në fushën e mbrojtjes dhe sigurisë me Çadin teksa vendi afrikan përballet me terroristët dhe grupet e tjera të armatosura, tha presidenti turk Recep Tayyip Erdoğan, raporton Anadolu Agency (AA).
“Turqia është e gatshme të zhvillojë bashkëpunim me Çadin, i cili po lufton njëkohësisht organizatat terroriste dhe grupet e armatosura opozitare, në fushën ushtarake, të mbrojtjes dhe të sigurisë”, tha Erdoğan në një konferencë të përbashkët shtypi pas një takimi me presidentin e përkohshëm të Çadit, Mahamat Idriss Deby Itno, në kryeqytetin turk Ankara.
Erdoğan tha se ata diskutuan marrëdhëniet dypalëshe të dy kombeve, si dhe çështjet rajonale, duke shtuar se Turqia do të mbështesë Çadin në periudhën e tij të tranzicionit.
“Me marrëveshjet e nënshkruara sot, Çadi do të bëhet një nga partnerët pionierë të Turqisë në Afrikë”, tha Erdoğan, duke shtuar se vendi i Afrikës Qendrore ka një potencial dhe rol të madh në rajon.
Erdoğan vuri në dukje se vëllimi i tregtisë dypalëshe midis dy vendeve ka arritur në 112 milionë dollarë, një rritje prej 47 për qind në përgjithësi, me synimin për të arritur në 200 milionë dollarë dhe më pas në 500 milionë dollarë.
Të dy vendet do të vazhdojnë të punojnë për thellimin e mëtejshëm të marrëdhënieve dhe pasurimin e diversitetit në tregti në një qasje gjithëpërfshirëse dhe “fito-fito”, shtoi Erdoğan.
