Tregtia ndërkombëtare e armëve shënoi rënie me 4.6 për qind në 5 vitet e fundit.
Evropa regjistroi rritjen më të madhe të importit të armëve në periudhën 2017-2021 krahasuar me periudhën e mëparshme pesëvjeçare në sfondin e një rënie të përgjithshme të tregtisë globale të armëve.
Importet e armëve nga vendet evropiane u rritën me 19 për qind midis 2012-2016 dhe 2017-2021, duke përbërë 13 për qind të transfertave globale të armëve, të cilat treguan një rënie të përgjithshme prej 4.6 për qind në të njëjtën periudhë, thuhet në raportin e Institutit të Stokholmit për Kërkimet Ndërkombëtare të Paqes (SIPRI).
“Përkeqësimi i thellë i marrëdhënieve midis shumicës së shteteve evropiane dhe Rusisë ishte një shtytës i rëndësishëm i rritjes në importet evropiane të armëve, veçanërisht për shtetet që nuk mund të përmbushin të gjitha kërkesat e tyre përmes industrive të tyre kombëtare të armëve”, tha Pieter Wezeman, studiues i lartë i Programit të Transferimit të Armëve në SIPRI.
“Rritja ose vazhdimi i niveleve të larta të importeve të armëve në vende si Evropa, Azia Lindore, Oqeania dhe Lindja e Mesme kontribuan në akumulimin shqetësues të armëve”, theksoi Wezeman.
Importuesit më të mëdhenj të armëve në Evropë ishin Britania e Madhe, Norvegjia dhe Holanda në periudhën pesëvjeçare ndërsa importet e Ukrainës ishin shumë të kufizuara pavarësisht konfliktit të armatosur në rajonin e saj lindor.
Në nivel global, në periudhën 2017-2021, tre importuesit kryesorë të armëve ishin India, Arabia Saudite dhe Egjipti.
Importet e armëve të Indisë ranë me 21 për qind në pesë vitet e fundit, por ajo mbeti ende importuesja më e madhe globale. India po planifikon importe në shkallë të gjerë armësh në vitet e ardhshme nga disa furnizues.
Raporti shton më tej se importet e armëve luajtën një rol të rëndësishëm në zhvillimet e sigurisë në rajonin e Gjirit për shkak të konfliktit në Jemen dhe tensioneve midis Iranit dhe shteteve të tjera.
Importet e armëve të Arabisë Saudite u rritën me 27 për qind midis 2012-2016 dhe 2017-2021, ndërsa importet e armëve të Katarit u rritën me 227 për qind, duke e çuar atë nga importuesi i 22-të më i madh i armëve në të gjashtin.
Nga ana tjetër, importet e armëve nga Emiratet e Bashkuara Arabe u tkurrën me 41 për qind, duke e çuar atë nga importuesi i tretë më i madh në importuesin e nëntë më të madh të armëve në nivel global.
Në eksportet e armëve, SHBA-ja dhe Franca regjistruan një rritje, ndërsa Rusia, Kina dhe Gjermania shënuan një rënie në pesë vitet e fundit.
Eksportet e armëve të SHBA-së u rritën me 14 për qind në pesë vitet e mëparshme, duke rritur pjesën e saj globale në 39 për qind në 2017-2021 ndërsa Franca përbënte 11 për qind të të gjitha eksporteve të armëve me një rritje prej 59 për qind në pjesën e saj globale.
Rusia, e cila përbënte 19 për qind të totalit të eksporteve kryesore të armëve në 2017-2021, shënoi rënie të eksporteve të saj me 26 për qind në të njëjtën periudhë, për shkak të rënies së dërgesave drejt dy blerësve të saj, Indisë dhe Vietnamit.
Pas SHBA-së, Rusisë dhe Francës, Kina ishte eksportuesja e katërt më e madhe e armëve ndërsa Gjermania e pesta.
