“Ukraina ka nevojë për mbështetje të mëtejshme ushtarake për të mbrojtur veten”, u tha gazetarëve ministrja e Jashtme gjermane Annalena Baerbock, përpara një takimi të ministrave të jashtëm të BE-së në Luksemburg.
Gjermania ka deklaruar se vendet evropiane duhet të dërgojnë armë të rënda dhe më shumë pajisje ushtarake në Ukrainë, mes frikës se Rusia së shpejti do të intensifikojë sulmet në rajonin lindor të Donbasit.
“Ukraina ka nevojë për mbështetje të mëtejshme ushtarake për të mbrojtur veten”, u tha gazetarëve shefja e diplomacisë gjermane, Annalena Baerbock, përpara një takimi të ministrave të jashtëm të Bashkimit Evropian (BE) në Luksemburg.
“Është e qartë se Ukraina ka nevojë për pajisje të tjera ushtarake, veçanërisht armë të rënda. Tani kemi nevojë për kreativitet dhe pragmatizëm, nuk është koha për justifikime”, theksoi Baerbock, duke shtuar se Gjermania do të vazhdojë përpjekjet e saj në koordinim të ngushtë me aleatët.
Presidenti ukrainas, Volodymyr Zelenskyy, vazhdimisht u ka bërë thirrje vendeve perëndimore që të rrisin furnizimet e tyre me armë, armë të rënda, sisteme të mbrojtjes ajrore, tanke dhe aeroplanë.
Shefi i politikës së jashtme të BE-së, Josep Borrell, më herët paralajmëroi se lufta duket se do të intensifikohet në ditët në vijim.
“Trupat ruse po grumbullohen në lindje për të nisur një sulm në Donbas. Ukrainasit janë shumë të vetëdijshëm për këtë. Pra, kam frikë se në ditët në vijim, lufta do të rritet në Donbas”, u tha Borrell gazetarëve në Luksemburg.
