“Poshtë prokuroria patriarkale”, “Poshtë policia patriarkale”, “Prokuroria i ka duart me gjak”, janë disa nga thirrjet e marshit protestues kundër vrasjes së grave organizuar nga kolektivi “Marshojmë s’festojmë”, raporton Ekonomia Online.
Me ngjyrë të kuqe, që simbolizon gjakun, janë lyer dyert e Pallatit të Drejtësisë, ku gjithashtu është shkruar “Edhe sa gra të vrara?”.
Marshi protestues ka nisur nga Pallati i Drejtësisë, për të vazhduar deri te objekti i Qeverisë së Kosovës.
Në këtë protestë u kërkua llogari nga institucionet përkatëse për të gjitha grat e vrara ku theksojnë së nuk do kenë qetësi derisa të arrihet drejtësia në vend dhe te garantohet siguria.
“Këtë 8 mars i denoncojmë si vetë fajtore të gjitha institucionet e drejtësisë për vrasjen e grave. Që nga viti 2010, 48 gra janë vrarë nga burrat në Kosovë. Janë pikërisht këto institucione të cilat dështuan t’i mbrojnë gratë edhe ato kur kërkuan ndihmë. Janë këto Gjykata e Prokurori, që vazhdojë t’i neglizhojnë gratë e t’i trajtojnë si qytetar të rendit të dytë”.
“Ne e dimë përderisa ka policë e prokurorë që lirojnë burra dhunues, gratë do të përfundojnë të vrara nga burrat. Njëjtë sikur Lirie Qerimaj që u vra këtë vit pasi që bashkëshorti i saj u lirua edhe pas raportimit të saj për dhunë. Ne e dimë që përderisa ka gjykatës, prokurorë e institucione që besojnë se gratë meritojnë të ngacmohen, të përdhunohen, të rrihen a vriten, për neve nuk mund të ketë siguri e qetësi. Këtë 8 mars duam ta kthejmë vëmendjen te zinxhiri i kalbur patriarkal i drejtësisë, kjo pasi që këto institucione po i vrasin gratë njëherë duke mos i dalë në ndihmë sa janë gjallë e po i vrasin për së dyti duke i dhënë dënime të ulëta vrasësve. Ne sot kërkojmë llogari nga secili institucion veç e veç për të gjithë ato gra të vrara”, tha ajo.
