Raporti Evropian i Islamofobisë 2020 tregon se karahas politikës, drejtësisë dhe jetës sociale, islamofobia në kontinentin e Evropës ka rritur ndikimin edhe në fushën e arsimit.
Sipas “Raportit Evropian të Islamofobisë 2020”, antiislamizmi që ka shënuar rritje në Evropë në politikë, drejtësi dhe jetën sociale, gjithashtu ka rritur ndikimin e tij edhe në arsim, transmeton Anadolu Agency (AA).
Raporti u përgatit nga Enes Bayrakli, profesor i marrëdhënieve ndërkombëtare në Universitetin Turko-Gjerman me qendër në Stamboll, dhe Farid Hafez, shkencëtar politik nga Iniciativa Ura e Universitetit Georgetown.
Raporti ka përfshirë kontribute nga 37 akademikë, ekspertë dhe aktivistë të shoqërisë civile në mbulimin e 31 vendeve evropiane.
Raporti mbështetet nga Shoqata Ndërkombëtare e Studimeve dhe Kërkimeve të Islamofobisë (IISRA), Instituti i Tjetërsimit dhe Përkatësisë në Universitetin e Kalifornisë, Qendra për Siguri, Racë dhe të Drejta në Universitetin Rutgers, Qendra Ndërkombëtare e Studimeve të Islamofobisë, Projekti i Kërkimit dhe Dokumentimit të Islamofobisë (IRDP) në Qendrën për Racën dhe Gjininë në Universitetin e Kalifornisë, Studimet për Etnitë dhe Diasporat Arabe dhe Muslimane (AMED) në Universitetin Shtetëror të San Franciskos dhe Instituti Leopold Weiss.
Në raport janë trajtuar praktikat antimuslimane në sistemin e arsimit në Evropë, ndërsa arsimi në disa vende të rajonit është përdorur si mjet për të nxitur antiislamizmin.
– Në shkollat në Bullgari bëhet antiosmanizëm
Në një studim mbi diskriminimet në sistemin arsimor të Bullgarisë, theksohet se në orë mësimore mësohet historia me perceptimin se “shteti osman i islamizoi me dhunë bullgarët e krishterë”, me ç’rast është vënë re se nxënësve muslimanë u është portretizuar si “armiq të përjetshëm”.
Sociologu iranian Prof. Mesud Kemali, në hulumtimin e tij zbuloi se diskriminimi ndaj emigrantëve dhe veçanërisht muslimanëve është pothuajse i integruar në kurrikulën e shkollave në Suedi.
Partia Demokratike e ekstremit të djathtë në Suedi, në vitin 2018 kishte paraqitur një projektligj në parlament për të ndaluar të gjitha shkollat muslimane në vend. Ndonëse projektligji nuk kaloi në parlament, qeveria në vitin 2020 vendosi mosndërtimin e shkollave të reja fetare në vend.
– Në Holandë vazhdon diskriminimi ndaj personave me orgjinë turke
Në një raport të përgatitur nga Instituti Holandez për Kërkime Sociale, u zbulua se nxënësit shtetas holandezë me origjinë turke dhe marokene ende i nënshtrohen diskriminimit dhe si rezultat i përjashtimit nga shoqëria po humbin gradualisht besimin e tyre ndaj vendit.
Në raport u pohua se diskriminimi në fjalë është bërë për arsye fetare si dhe për origjinën e tyre etnike.
Qeveria belge, nga ana tjetër, ndaloi shaminë në institucionet e arsimit të lartë, duke sjellë antiislamizmin në fushën e arsimit.
Gjykata Kushtetuese në Belgjikë, në qershor të vitit 2020, nën petkun e “paanshmërisë”, vendosi se ndalimi i simboleve politike dhe fetare, veçanërisht i shamisë, në institucionet e arsimit të lartë është në përputhje me ligjin.
