Vitali Klitschko në forumin e OKB-së për kryetarët e bashkive tha se Rusia po zhvillon luftë kundër civilëve të Ukrainës
Kryebashkiaku i Kievit, Vitali Klitschko, i ka kërkuar botës të zbatojë më shumë sanksione kundër Rusisë dhe t’i ofrojë vendit të tij ndihmë humanitare, armë dhe mbështetje politike, duke akuzuar Moskën për “gjenocid” në Ukrainë, raporton Anadolu Agency (AA).
Klitschko iu drejtua Forumit të Dytë të Kryebashkiakëve 2022 të organizuar nga Komisioni Ekonomik i Kombeve të Bashkuara për Evropën, me ç’rast akuzoi Rusinë për “agresion” dhe kryerje të “luftës kundër civilëve”.
Klitschko tha se një ditë më parë, ai kishte parë skena tronditëse në Bucha, një qytet në hyrje të Kievit ku, siç tha ai, rusët kishin qëlluar 300 civilë. Trupat e tyre u hodhën në rrugë ose u lanë në varre masive.
“Në qytetin tonë të lindjes Kiev, sulmet me raketa ruse shkatërruan mbi 100 ndërtesa banimi. Më shumë se 100 civilë kanë vdekur dhe më shumë se 300 janë në spital në gjendje kritike”, tha kryebashkiaku, duke vënë në dukje se nuk janë kursyer as fëmijët.
Ai tha se sulmet datojnë që nga viti 2014, duke përmendur rrëzimin e një avioni të Malaysian Airlines me raketa ruse mbi Ukrainën lindore.
“Ky është gjenocid. Kjo është një luftë kundër civilëve. Kjo luftë është kundër vendit tonë. Qëllimi kryesor është shkatërrimi i vendit. Kjo luftë nuk ka rregulla”, tha Klitschko, duke vënë në dukje se ai drejton qytetin më të madh në “Evropën Lindore”.
Kryebashkiaku tha se mijëra civilë ukrainas u vranë nga “agresioni rus”. Ai shtoi se në qytetin e rrethuar të Mariupolit në Ukrainën jugore mijëra janë të bllokuar dhe 5.000 civilë janë vrarë.
Ai tha se lufta është e keqe për Ukrainën dhe gjithashtu për Rusinë, ku 20.000 trupa ruse kanë humbur jetën në luftimet që filluan më 24 shkurt.
Klitschko tha se Ukraina thjesht dëshiron të mbrojë popullin dhe lirinë e saj dhe nuk synon të zgjerohet në vende të tjera, duke vënë në dukje se vendi kishte hequr dorë nga të qenit fuqi bërthamore në 1994.
“Ne duhet të mbrojmë vendin tonë”, tha kryebashkiaku i Kievit. Ai tha se “propaganda ruse” thotë se “është për një luftë kundër nacionalistëve, fashistëve dhe radikalëve”. Kjo, tha ai, është një gënjeshtër.
“Ringritja e perandorisë ruse”
“Është e qartë, (Presidenti rus Vladimir) Putin ka thënë se ideja është të ringrihet Perandoria Ruse për të ringritur Bashkimin Sovjetik. Ndërkaq, qëllimi kryesor i rusëve është të marrin Ukrainën nën ndikimin e Federatës Ruse dhe të kenë kontroll të plotë mbi të gjithë vendin”, tha Klitschko.
“Armët kryesore tani për rusët nuk janë tanket; nuk janë avionët. Armët kryesore tani janë media”, tha ai, duke iu referuar propagandës së tyre.
Klitschko tha: “Nuk është sekret… Rusia sot ka një buxhet shumë më të madh se ai i kryeqytetit tonë të Ukrainës që është më shumë se 2 miliardë euro (2,2 miliardë dollarë).
Kryebashkiaku u kërkoi vendeve të “ndalojnë komunikimin tregtar me Rusinë, sepse çdo euro, çdo cent, që ata marrin nga rusët, ose ajo që ju dërgoni në Rusi ka gjak të ukrainasve”.
Pasi pa “fotografitë dhe imazhet e tmerrshme nga Ukraina” të kryera nga forcat ruse mbi civilët, Klitschko i kërkoi botës të mos investojë para që i mundësojnë ushtrisë së Moskës të veprojë ashtu siç ka bërë.
