Sipas vlerësimeve fillestare, rreth 5.000 njerëz, duke përfshirë 210 fëmijë, kanë vdekur në qytetin e rrethuar për vetëm një muaj, tha kryetari i bashkisë së Mariupolit, Vadim Boychenko.
Kryetari i qytetit Mariupol të Ukrainës, Vadim Boychenko, tha se në qytetin që ishte nën rrethim, për një muaj u vranë rreth 5000 njerëz, mes të cilëve 210 fëmijë, raporton Anadolu Agency (AA).
Administrata e qytetit Mariupol njoftoi se Boychenko mori pjesë në një tryezë të rrumbullakët me video-lidhje, ku u diskutua për pasojat politike dhe ligjore të krimeve të kryera nga Rusia në Ukrainë.
Me këtë rast, Boychenko tha se forcat ruse tani pothuajse e kanë shkatërruar plotësisht Mariupolin, i cili ka qenë një simbol i zhvillimit të vendit në kohët e fundit.
Sipas tij, më shumë se 90 për qind e infrastrukturës së qytetit është shkatërruar. “Të paktën 40 për qind e kësaj nuk mund të shpëtohet më”, tha Boychenko.
Ai konsideron se vendet evropiane duhet t’i përgjigjen krimeve kundër popullit ukrainas.
“Sipas vlerësimeve fillestare, në Mariupol, i cili është nën rrethim, për vetëm një muaj kanë vdekur rreth 5.000 njerëz, përfshirë 210 fëmijë. Njësitë terroriste ruse sulmuan spitalin e fëmijëve me disa bomba të fuqishme. Ata shkatërruan një nga godinat e spitalit kryesor të qytetit. Godina e teatrit ku fshiheshin më shumë se 900 njerëz u bombardua. Këto janë vetëm disa nga shembujt se si popullsia civile në Mariupol po shkatërrohet”, tha Boychenko.
Në vijim janë aktivitete për nxjerrjen e njerëzve nga rrënojat, kurse përfaqësues të forcave vendase theksojnë se kanë nevojë për pajisje shtesë për largimin e rrënojave.
