Presidenti tunizian të dielën shkarkoi kryeministrin dhe pezulloi parlamentin.
Kryetari i Parlamentit të Tunizisë, Rached Ghannouchi, tha se asambleja është ende në detyrë, një ditë pasi Presidenti Kais Saied shkarkoi qeverinë dhe pezulloi parlamentin, raporton Anadolu Agency (AA).
“Pezullimi i parlamentit është antikushtetues, i paligjshëm dhe i pabazë. Parlamenti është ende në këmbë dhe do të kryejë detyrat e tij”, tha Ghannouchi në një deklaratë të publikuar në faqen e asamblesë në Facebook.
Të dielën, Saied shkarkoi qeverinë e Kryeministrit Hicham Mechichi, pezulloi parlamentin dhe mori autoritetin ekzekutiv me ndihmën e një kryeministri të ri.
Saied tha se vendimet e tij janë në përputhje me nenin 80 të Kushtetutës, i cili lejon presidentin të marrë masa të jashtëzakonshme nën kërcënime serioze për të mbrojtur vendin. Megjithatë, neni kushtëzon marrjen e masave të tilla në konsultim me kreun e qeverisë dhe kryetarin e parlamentit.
Ghannouchi theksoi se ai nuk u këshillua nga presidenti tunizian në lidhje me vendimet e së dielës. “Ne sigurojmë popullin tunizian dhe miqtë e Tunizisë në botë se zëri i saj i lirë nuk do të nënshtrohet kurrë”, tha Ghannouchi.
Tunizia është përfshirë në një krizë të thellë që nga 16 janari, kur Mechichi njoftoi një riorganizim të kabinetit, por Saied refuzoi të mbajë ceremoninë e betimit të ministrave të rinj. Tunizia gjithashtu përballet me një përhapje të paparë të COVID-19 në shumicën e shteteve, duke shkaktuar një përhapje të shpejtë të virusit.
Tunizia shihet si i vetmi vend arab që arriti të kryejë tranzicionin demokratik midis vendeve të tjera arabe që gjithashtu dëshmuan revolucione popullore në të cilat u rrëzuan regjimet në pushtet, duke përfshirë Egjiptin, Libinë dhe Jemenin.
