Emisari i Bashkimit Europian (BE) për dialogun Kosovë-Serbi, Miroslav Lajcak, ka njoftuar se sot në mëngjes në kuadër të forumit diplomatik në Antalia të Turqisë është takuar me kryeministrin e Republikës së Kosovës, Albin Kurti, shkruan Gazeta Metro.
Në një postim në Twitter, Lajcak ka thënë se me Kurtin ka pasur një bisedë të vlefshme rreth hapave konkret që duhet marrë me qëllim të shtyrjes përpara të agjendës së përbashkët në rrethanat aktuale.
“Sot në mëngjes në Antalia pata një diskutim të dobishëm me kryeministrin e Kosovës Albin Kurti për hapat konkretë të ardhshëm në mënyrë që të çojmë përpara agjendën tonë të përbashkët në rrethanat aktuale”, ka shkruar Lajcajk.Ndërkaq kujtojmë që dje në Bruksel, është zhvilluar takimi i gjashtë i grupeve punuese të Kosovës dhe Serbisë për targat e automjeteve. Mbajtja e këtij takimi është konfirmuar nga i Përfaqësuesi Special i Bashkimit Evropian për dialogun Kosovë-Serbi, Miroslav Lajcak.
Lajcak, përmes një postimi në Twitter mbrëmë, ka thënë se ekspertët e BE-së ndihmuan të dy delegacionet në identifikimin e të gjitha opsioneve ekzistuese dhe implikimet e tyre teknike
“Ndërkohë, delegacionet e ekspertëve të Kosovës dhe Serbisë janë takuar sot në Bruksel për takimin e gjasht të Grupit Punues për Targat. Ekspertët e BE-së ndihmuan të dy delegacionet në identifikimin e të gjitha opsioneve ekzistuese dhe implikimet e tyre teknike. Tani është koha për t’u angazhuar në gjetjen e interesave të përbashkëta”, ka shkruar Lajcak.
