Mahmoud Abbas: Pa Kudsin nuk mbajmë zgjedhjet

Presidenti i Palestinës, Abbas, tha se nuk do të mbajnë zgjedhje pasi Izraeli refuzon mbajtjen e tyre në qytetin e okupuar të Kudsit Lindor.

Presidenti palestinez Mahmoud Abbas vendosi të enjten të shtyjë zgjedhjet parlamentare të planifikuara për 22 maj, transmeton Anadolu Agency (AA).

Duke potencuar si arsye refuzimin e Izraelit për mbajtjen e zgjedhjeve në qytetin e okupuar të Kudsit Lindor, Abbas tha ata nuk do të mbajnë zgjedhje me përjashtimin e Kudsit nga votimi.

“Ne nuk do të shkojmë në zgjedhje pa Kudsin e okupuar. Unë dua zgjedhje në Kuds si në Bregun Perëndimor”, deklaroi ai në një fjalim televiziv.

Ai tha se pala izraelite nuk i kishte dhënë përgjigje kërkesës palestineze për hapjen e qendrave të votimit në Kuds “sepse nuk ka qeveri izraelite për të marrë një vendim të tillë”.

Abbas shtoi se Bashkimi Evropian informoi palën palestineze për zhgënjimin e tyre për mosmarrjen e një përgjigjeje nga pala izraelite.

Abbas zbuloi se izraelitët kërcënuan me arrestimin e Hanna Nasser, kryetarin e Komisionit Qendror të Zgjedhjeve, nëse ai shkonte në Kuds për përgatitjen e zgjedhjeve.

Megjithatë, ai theksoi se sapo Izraeli të lejojë zgjedhjet në Kuds, votimi do të mbahet “brenda një jave”.

Hamas, nga ana e tij, kritikoi hapin e pritur të Abbas-it.

Një nga krerët e lartë të Hamasit, Jamal al-Tawil, deklaroi për AA më herët se grupi kundërshton shtyrjen e zgjedhjeve palestineze.

“Vendimi i shtyrjes (së zgjedhjeve), nëse ndodh, është një vendim serioz. Ky vendim është i papranueshëm dhe përbën shkelje të interesave më të mëdha të popullit palestinez”, tha ai.

Tawil shtoi se mbajtja e zgjedhjeve në Kuds është e nevojshme dhe mund të bëhet “teknikisht dhe politikisht”, pa lejen e Izraelit.

Ndërkohë, qindra palestinezë të zemëruar janë mbledhur në qendër të Ramallahut për të dënuar vendimin e presidentit palestinez.

Në fillim të kësaj jave, e përditshmja “Al-Quds”, e afërt me Autoritetin Palestinez, zbuloi se Abbas ishte nën presionin arab dhe amerikan për të shtyrë zgjedhjet.

E përditshmja shtoi se presioni erdhi pasi kishte frikë se Hamasi mund të fitonte zgjedhjet.

Kategoritë
BotaLajme