“Si mjek dhe ministër, kam integritet. Prandaj, sot për arsye morale i ofrova një dorëheqje me shkrim kryeministrit Zoran Zaev”, tha Filipçe
Ministri i Shëndetësisë i Maqedonisë së Veriut, Venko Filipçe, ofroi dorëheqje për arsye morale pas zjarrit në qendrën për COVID në Tetovë ku humbën jetën 14 persona, transmeton Anadolu Agency (AA).
Në një konferencë për media, ministri Filipçe edhe një herë shprehi keqardhje dhe tha se kryeministrit të Maqedonisë së Veriut, Zoran Zaev, i ka ofruar dorëheqje me shkrim.
“Tragjedia e fundit në Tetovë më preku shumë, më vjen shumë keq për viktimat, bashkëndjej me familjet e tyre. Nuk ka fjalë për ta përshkruar atë ose një mënyrë për të kompensuar humbjen. Zonja dhe zotërinj, si mjek dhe ministër, kam integritet. Prandaj, sot për arsye morale i ofrova një dorëheqje me shkrim kryeministrit Zoran Zaev”, tha Filipçe.
Përpos tij, më herët dorëheqjen e njoftoi edhe zv/ministri i Shëndetësisë, Ilir Hasani, i cili në rrjetet sociale shkroi se “dorëheqja është akti më i vogël që mund ta bëj në këto momente, për të respektuar viktimat, të lënduarit, opinionit dhe më së shumti veten”.
Gjithashtu, dorëheqje kanë ofruar edhe drejtori i spitalit të Tetovës dhe drejtori për çështje ekonomike i spitalit.
Në zjarrin që shpërtheu të mërkurën në qendrën ku trajtohen pacientët me COVID-19 në Tetovë humbën jetën 14 persona, ndërsa 12 të tjerë janë plagosur.
Institucionet e vendit ende po hetojnë rastin, ndërsa Qeveria e Maqedonisë së Veriut njoftoi se edhe ekspertë gjermanë nga Kriminalistika Federale (Bundeskriminalamt) do të vijnë këto ditë për të ndihmuar në hetimin e fatkeqësisë në Tetovë.
