Ministri rus i Mbrojtjes Sergey Shoygu tha se automjetet e transportit të vendeve të NATO-s që dërgojnë armë në Ukrainë janë objektiva legjitime të ushtrisë ruse.
Ministri rus i Mbrojtjes Sergey Shoygu tha se automjetet e transportit të vendeve të NATO-s që dërgojnë armë në Ukrainë janë objektiva legjitime të ushtrisë ruse.
Në fjalimin e tij në takimin me zyrtarët e ministrisë, Shoygu deklaroi se ushtria ruse zgjeroi zonën nën kontrollin e saj në Donbass me trupat e të ashtuquajturave Republika Popullore të Donjeckut dhe Luganskut në ofensivën në Ukrainë.
Duke thënë se ushtarët rusë morën masa gjithëpërfshirëse për të mbrojtur civilët, Shoygu deklaroi se në zonat e konfliktit u vendos një armëpushim i përkohshëm dhe çdo ditë hapeshin korridore humanitare për evakuimin e sigurt të civilëve.
Ai tha se qyteti i Mariupolit është nën kontrollin e ushtrisë ruse dhe shtoi se në qytet ka filluar kthimi në jetën normale.
Duke vënë në dukje se forcat ukrainase në Uzinën Metalurgjike Azovstal janë nën rrethim, Shoygu tha: “Propozimet e përsëritura për nacionalistët për të liruar civilët dhe për të lënë armët e tyre, me garancinë e mbrojtjes së jetës së tyre dhe të trajtimit në përputhje me normat e ligjet ndërkombëtare, janë injoruar prej tyre. Ne vazhdojmë përpjekjet tona”.
Shoygu bëri një deklaratë edhe në lidhje me mjetet e mbushura me armë të NATO-s që shkojnë në Ukrainë. “SHBA dhe aleatët e NATO-s vazhdojnë të dërgojnë armë në Ukrainë. Çdo mjet transporti i Aleancës së Atlantikut të Veriut që vjen në territorin e vendit me armë ose materiale për nevojat e Forcave të Armatosura të Ukrainës do të shkatërrohet nga ne, ato janë një objektiv legjitim për t’u ndjekur”, tha ministri rus.
Duke dhënë informacion për paradën e Ditës së Fitores së 9 majit që do të mbahet në Sheshin e Kuq në Moskë, kryeqyteti i Rusisë, ministri Shoygu tha se në ceremoni do të marrin pjesë 11 mijë ushtarë, 131 lloje armësh dhe mjete teknike ushtarake, 77 avionë dhe helikopterë.
