Autoritetet shëndetësore të Zelandës së Re kanë nisur një hetim pasi një burrë dyshohet se është vaksinuar dhjetë herë brenda një dite kundër COVID-19.
Burri besohet se është paguar për t’u vaksinuar në vend të personave të tjerë, shkruan nzherald.
Ministria e Shëndetësisë së Zelandës së Re e ka marrë seriozisht situatën, tha Astrid Koornneef, kreu i programit të vaksinës dhe imunizimit kundër coronavirusit, “Ne jemi shumë të shqetësuar për këtë situatë dhe po punojmë me agjencitë përkatëse”.
Në Zelandën e Re, njerëzit nuk duhet të tregojnë një dokument identifikimi kur marrin vaksinën.
Shumë kompani dhe objekte në vend përdorin një certifikatë vaksinimi vendase që lejon hyrjen në vende vetëm për personat e vaksinuar plotësisht.
Rreth 89 për qind e Zelandës së Re janë plotësisht të vaksinuar. Me një popullsi prej 5 milionë banorësh, vendi ka raportuar rreth 12,500 raste dhe 46 vdekje që nga fillimi i pandemisë.
