Organizata Botërore e Shëndetësisë (OBSH) ka aprovuar vaksinën kineze Sinovac Biotech për përdorim urgjent.
Deklarata thekson se miratimi i OBSH-së është një sinjal për organet rregullatore kombëtare që përgatitja është e sigurt dhe efektive dhe mundëson që vaksinat e aprovuara nga OBSH-ja të gjenden në programin global, “Covax”, e cila siguron vaksina për vendet e varfra duke përfshirë Kosovën.
Procesi i analizës së grupit këshillimor teknik të OBSH-së filloi më 5 maj dhe vendimi u mor pas analizës së të dhënave më të fundit klinike mbi sigurinë në efikasitetin e vaksinave Sinovac dhe procesit të prodhimit në kompaninë kineze, raporton reuters.
Kjo është vaksina e dytë kineze që mori një leje përdorimi emergjente pasi përgatitja e ndërmarrjes shtetërore kineze Sinopharm mori “dritën jeshile”. Është paraqitur edhe një kërkesë për vaksinën e tretë kineze, CanSino Biologics, por nuk dihet kur do të përfundojë procedura e analizës dhe verifikimit në OBSH.
Sipas OBSH, në të gjithë rajonin që mbulon një pjesë të Azisë Qendrore, numri i rasteve të reja ra me 60 për qind në një muaj, nga 1.7 milion në mes të prillit në 685,000 javën e kaluar.
