Për “emergjencë kombëtare” foli pak më parë ministri gjerman i Shëndetësisë, Jens Spann, dhe la të hapur mundësinë e vendosjes së një bllokimi të ri të plotë, ndërsa kreu i Institutit ‘Robert Koch’ Lothar Wiler e përshkroi vendin si “një shpërthim të madh të koronavirusit” , pasi për herë të parë që nga fillimi i pandemisë, pacientët po transportohen nga shteti në shtet për shkak të mbingarkesës së sistemit shëndetësor.
“Me fjalë të thjeshta: jemi në situatën më të vështirë të pandemisë”, tha Span, duke pranuar se shteti duhet të kishte vënë në dukje më herët se vala e katërt nuk mund të trajtohej me një shkallë kaq të ulët vaksinimi.
Duke iu drejtuar atyre që ende refuzojnë të vaksinohen, me tone të ashpra ministri i Shëndetësisë u shpreh: “Nuk e kuptoj, çfarë duhet të ndodhë tjetër? Ne nuk mund t’i tërheqim të gjithë në një njësi të kujdesit intensiv. Kjo është arsyeja pse janë të nevojshme kufizime shtesë të kontaktit, siç është një “bllokim për të pavaksinuarit”.
Megjithatë, duke iu përgjigjur një pyetjeje nëse ka mundësi imponimi dhe bllokimi i përgjithshëm, siç është ai që do të zbatohet në Austri nga e hëna e ardhshme, zoti Span theksoi: “Jemi në një situatë në të cilën nuk duhet të përjashtojmë asgjë. (…) Kjo do të jetë java e vendimeve”.
Nga ana e tij, kreu i Institutit Robert Koch, Lothar Wheeler, tha se “numri i rasteve tani është në mënyrë të papranueshme i lartë. Ne duhet të marrim masa tani,” tha Wheeler, duke shtuar se kujdesi mjekësor nuk është më i garantuar në shumë fusha.
“Mbyllja e boshllëqeve të vaksinimit dhe rregullat për aksesin në shërbime dhe ambiente vetëm për të vaksinuarit dhe të shëruarit nuk mjaftojnë më. Nevojitet një reduktim i gjerë i kontakteve për të ngadalësuar përhapjen e virusit.”
