Kryeministri i Kosovës, Albin Kurti, ka bërë të ditur se Qeveria e Kosovës do të ndajë shumën e nevojshme për mbulimin e importeve të energjisë dhe se do të bëhet maksimumi për të ruajtur furnizimin e rregullt.
Kurti ka treguar se dy blloqe të termocentralit Kosova B aktualisht janë jashtë funksionit, ndërsa ka thënë se situatë të ngjashme ishte javën e kaluar kur tri blloqe të Kosova A ishin jashtë funksionit shkaku i avarive.
“Kriza energjetike që ka prek gjithë vendet e rajonit dhe botës ka ardhur edhe tek ne. Kosova ret nga importet për të mbajtur dritat ndezut. Dy blloqe të termocentralit B aktualisht janë jashtë funksionit, një situatë të ngjashme kemi pasur edhe javën e kaluar por e kemi menaxhuar. Në këtë koment kemi diku 390 megavat prodhim. Kostti ka menaxhuar me sukses deri më tash situatën, pavarësisht pengesave nga Serbia. Deri më tash këto ndërmarrje kanë mbajtur barrën e krizës energjetike. Qeveria do të ndajë shumën e nevojshme për çmimin e importeve”, ka thënë Kurti në konferencë për media.
Ai ka thënë se është e nevojshme të kursehet energjia.
Ndërkohë ish-qeveritë i ka kritikuar për gjendjen aktuale.
“Vendime të këqija për dy dekada nuk u bënë riparime të qëndrueshme në termocentrale që do të siguronim prodhim të qëndrueshëm mbi bazën e kapaciteteve ekzistuese me sa më pak ndotje, e mungesa e vizionit tregohet pasi para një dekade ka qenë më lehtë të shtohen kapacitetet e energjisë, por ishte më me levërdi për ta ta vjedhin KEK-un sesa të investohej në të. Jemi në krye të detyrës e kemi gjetur shtetin përtoke në të gjitha drejtimet, por do ta ngrisim në këmbë. Këtë situatë duhet përmirësuar, por ata që na sollën këtë ditë le të na kursejnë nga leksionet e të skuqen nga gjendja në të cilën e lanë shtetin”, tha Kurti.
Ai ka treguar se në mbledhjen e Qeverisë është mirtuar vendimi për të kërkuar nga presidentja e Kosovës, Vjosa Osmani, dhënien e autorizimit për Ministrinë e Financave për nënshkrimin e marrëveshjes së kredisë mes Kosovës, KOSTT-it dhe KFW për projektin zhvillimi i sektorit të energjisë, përmirësimi i rrjetit të transmetimit.
