Siç njofton Zyra e Presidentit të Kosovës, në këtë takim janë diskutuar zhvillimet në tri shtetet që përfaqësojnë presidentët dhe në Ballkanin Perëndimor.
Presidentja e Republikës së Kosovës, Vjosa Osmani, presidenti i Malit të Zi, Millo Gjukanoviq, dhe kryetari i Presidencës së Bosnjës dhe Hercegovinës, Zheljko Komshiq, u takuan në New York gjatë javës së Nivelit të Lartë në Asamblenë e Përgjithshme të Organizatës së Kombeve të Bashkuara (OKB).
Siç njofton Zyra e Presidentit të Kosovës, në këtë takim janë diskutuar zhvillimet në tri shtetet që përfaqësojnë presidentët dhe në Ballkanin Perëndimor.
“Presidentët shprehën shqetësimin për zhvillimet e fundit në rajon dhe gjithashtu qëllimin e përbashkët të tyre për ruajtjen e stabilitetit si parakusht për perspektivën evropiane të të gjitha shteteve të Ballkanit Perëndimor”, thuhet në komunikatën e përbashkët të presidentëve të tri vendeve.
Të tre presidentët ranë dakord ta vazhdojnë komunikimin dhe dialogun për çështjen e stabilitetit rajonal për perspektivën evropiane.
Më 20 shtator Kosova mori vendim për reciprocitet me Serbinë për targat e automjeteve, duke lejuar futjen dhe qarkullimin e veturave me tabela të Serbisë vetëm me tabela të përkohshme të cilat zgjasin 60 ditë dhe kushtojnë 5 euro.
Një gjë e tillë shkaktoi reagim tek serbët të cilët jetojnë në komunat me shumicë serbe në territorin e Kosovës, të cilët që nga vendimi i palës kosovare kanë bllokuar rrugët në Bërnjak e Jarinjë të cilat çojnë në kufi me Serbinë.
Kryeministri i Kosovës, Albin Kurti, u ka bërë thirrje qytetarëve serbë t’i largojnë bllokadat nga rruga. Ndërsa tensionet e krijuara në veriun e Kosovës kanë vazhduar, Bashkimi Evropian ka kërkuar normalizim të situatës dhe ulje të tensioneve.
