Qendra tregtare në Kahramanmaraş për një kohë të gjatë ishte në krye të listës së rezultateve në Google si “ndërtesa më qesharake në botë”
Ndërtesa në jug të Turqisë, e cila prej kohësh kryeson listën e rezultateve në Google si “ndërtesa më qesharake në botë”, është gati për rrënim, raporton Anadolu Agency (AA).
Hayrettin Güngör, kryebashkiaku i qytetit Kahramanmaraş, ku dhe ndodhet ndërtesa, tha se prishja mund të zgjasë tre muaj.
“Ky objekt është ndërtuar 30 vite më parë si qendër e veçantë biznesi, por gjithmonë është kritikuar sepse bie në sy në peizazhin e qytetit”, tha Güngör.
Ndërtesa 18-katëshe ishte një atraksion me një fasadë të kuqe, të verdhë dhe të kaltër, si dhe me shtylla të larta të çuditshme që zënë gjysmën e kateve të poshtme.
Gungor shtoi se është vendosur që ndërtesa të rrënohet dhe është planifikuar një projekt i ri në atë vend.
Banorët e qytetit Kahramanmaraş e mbështetën këtë vendim. Njëri prej tyre, Ismail Kazan, tha se ishte i demoralizuar nga komentet e turistëve që panë ndërtesën.
Edhe Mehmet Fatih Baltutan beson se sheshi do t’i japë qytetit një pamje më të bukur në vend të ndërtesës.
