Ushtria turke çaktivizoi një minë të shtunën që kishte dalë nga Deti i Zi, duke shkaktuar një shpërthim të fuqishëm në veri të Stambollit, disa ditë pasi Rusia paralajmëroi se disa prej tyre ishin larguar nga portet ukrainase.
Ministri i Mbrojtjes, Halusi Akar, tha se objekti ishte zbuluar fillimisht nga peshkatarët në ngushticën e sipërme të Bosforit dhe tha se ishte në kontakt me autoritetet ruse dhe ukrainase për këtë.
Një dëshmitar i tha se dëgjoi një zhurmë të fortë në fshatin bregdetar të Rumelifenerit, ku ishin aktive anije detare dhe avionë ushtarakë dhe helikopterë. Sipas një dëshmitari të dytë, një anije gjuetare e minave u drejtua gjithashtu në zonë nga Stambolli.
“Mina, e përcaktuar si një tip i vjetër, u neutralizua nga ekipi ynë…dhe forcat detare vazhdojnë punën e tyre vigjilente”, tha Akar.
Më herët, roja bregdetare kishte paralajmëruar anijet që të qëndronin larg objektit të rrumbullakët që përplasej mbi dallgët dhe një ekip zhytjeje fillimisht hyri për të hetuar.
