Organizata izraelite e të drejtave të njeriut B’Tselem publikoi pamje të incidentit në llogarinë e saj në rrjetet sociale.
Ushtarët izraelitë kanë fotografuar 13 fëmijë duke i zgjuar nga gjumi gjatë një bastisjeje në mesnatë në qytetin Hebron në Bregun Perëndimor të pushtuar, transmeton Anadolu Agency (AA).
Organizata izraelite e të drejtave të njeriut B’Tselem publikoi pamje të incidentit në llogarinë e saj në rrjetet sociale.
Në video shihet se ushtarët izraelitë, të cilët bastisën një shtëpi palestineze në Hebron natën, zgjuan 13 fëmijët dhe i nxorën në oborr të shtëpisë, teksa familjarët përpiqeshin të qetësonin disa fëmijë që qanin dhe mblodhën fëmijët së bashku duke ndjekur urdhrat e ushtarëve.
Në pamje pasqyrohen momentet kur ushtari, duke fotografuar fëmijët, i urdhëron ata të buzëqeshin duke përdorur shprehjen “cheese”.
Duke folur për gazetën Yedioth Ahranoth, zëdhënësi i ushtrisë izraelite tha se incidenti ka ndodhur në shtator dhe se veprimet e ushtarëve ishin “të papërshtatshme”, prandaj ata u paralajmëruan dhe se do të forcohen masat për të parandaluar përsëritjen e incidenteve të tilla.
Zëdhënësi argumentoi se ushtarët bastisën shtëpinë në fjalë për të identifikuar ata që hodhën gurë në një vendbanim hebre aty pranë.
Është e paligjshme që ushtarët izraelitë të bëjnë fotografi të të miturve
Njoftohet se është e paligjshme që ushtarët izraelitë të fotografojnë të miturit.
Në deklaratën e tij për këtë temë, B’tselem theksoi se “këto imazhe zbulojnë se si palestinezët që jetojnë nën okupim, shqetësohen në mënyrë arbitrare dhe se si të drejtat e tyre shkelen nga ushtarët”.
“Duket se të gjithë palestinezët, duke përfshirë vajzat dhe djemtë e moshës së shkollës fillore, përbëjnë një kërcënim për ushtrinë izraelite,” tha organizata izraelite.
