Ministria palestineze e Vakëfit dhe Çështjeve Fetare dënoi aktin dhe bën thirrje për mbrojtjen e qyteteve të shenjta.
Ushtria izraelite shkatërroi një xhami në veri të Bregut Perëndimor të pushtuar, sipas një zyrtari lokal, raporton Anadolu Agency (AA).
Suleiman Dawabsheh, kreu i këshillit lokal në Douma, një fshat në jug të Nablusit, tha se forcat pushtuese sulmuan lagjen Al-Shakara duke bastisur xhaminë.
“Xhamia e rrënuar është dyvjeçare dhe ishte 60 metra katrorë”, tha Dawabsha për AA, duke shtuar se rreth 50 banorë nga lagjja e frekuentojnë xhaminë për falje.
Zyrtari tha se ushtria izraelite rrafshoi xhaminë me arsyetimin se ajo ishte ndërtuar në një zonë të klasifikuar si zona C pa leje.
Sipas Marrëveshjes së Oslos të vitit 1995 midis Izraelit dhe Autoritetit Palestinez, Bregu Perëndimor, duke përfshirë Kudsin Lindor, u nda në tre pjesë, Zona A, B dhe C, ku zona C ka mbetur nën kontrollin administrativ dhe të sigurisë të Izraelit deri në një marrëveshje përfundimtare të statusit.
Dawabsheh vuri në dukje gjithashtu se dy objekte bujqësore në jug dhe në perëndim të qytetit u shkatërruan “me qëllim të kufizimit të zgjerimit urban të fshatit Douma nga tre anët dhe të hapjes së rrugës për zgjerimin e vendbanimeve”.
Ministria palestineze e Vakëfit dhe Çështjeve Fetare lëshoi një deklaratë duke dënuar rrënimin e xhamisë.
“Rrënimi i xhamisë në Douma është një krim i ri që i shtohet krimeve të okupimit kundër vendeve të shenjta”, thuhet në deklaratë.
Ai e përshkroi rrënimin e xhamisë si një “sulm të qartë ndaj vendeve të shenjta dhe vendeve fetare për muslimanët”.
Brenda Zonës C aktualisht jetojnë rreth 300.000 palestinezë, shumica dërrmuese e të cilëve janë beduinë dhe komunitete të bagëtive që jetojnë kryesisht në tenda dhe shpella.
Sipas Zyrës së Kombeve të Bashkuara për Koordinimin e Çështjeve Humanitare (OCHA), forcat izraelite shkatërruan të paktën 698 struktura në pronësi të palestinezëve dhe zhvendosën 949 palestinezë në zonën C të Bregut Perëndimor dhe Kudsit Lindor që nga fillimi i këtij viti.
