Austria ka vendosur në izolim miliona persona që nuk janë vaksinuar plotësisht kundër Covid-19.
Karina, një mësuese yoga në Vjenë, nuk është e vaksinuar kundër Covid-19 dhe dëshiron të mbetet e tillë. Por as Karina ashtu si dhe 2 milionë austriakë ta pakvaksinuar nuk i kanë shpëtuar izolimit.
Ajo lejohet të dalë nga shtëpia vetëm për arsye bazike si puna ose blerja për ushqim. Asaj i ndalohet hyrja në kafene dhe restorante.
Karina thotë se nuk e logjikon arsyetimin për bllokimin e të pavaksinuarve dhe se kjo e bën të ndihet e trishtuar, shkruan BBC
“Sot në mëngjes isha duke ecur pranë disa kafeneve. Është pak e çuditshme të shikosh brenda dhe të dish se nuk mund të hysh. Kjo më bën të ndihem vërtet e përjashtuar. Jam bërë armik në vendin tim”, thotë Karina.
Rreth 65% e popullsisë së Austrisë është plotësisht e vaksinuar, një nga normat më të ulëta në Evropën Perëndimore.
Aktualisht vendi po përjeton shkallën më të lartë të infeksioneve ditore për Covid-19 , që nga fillimi i pandemisë.
Kancelari Alexander Schallenberg thotë se qeveria u detyrua të vepronte për shkak të rritjes së infeksioneve të reja.
Ky shtet është i pari në Evropë që ka vendosur të kthejë në fuqi disa masa kufizuese për lëvizjet e përditshme të njerëzve, masa këto që kishin vlejtur gjatë kohës kur nuk kishte ende vaksinim kundër Covid-19.
