Presidenti i Serbisë, Aleksandar Vuçiç, i cili kohët e fundit fitoi një mandat të dytë, deklaroi të dielën se vendosja e sanksioneve ndaj Rusisë do t’i kushtonte shtrenjtë vendit të tij.
Në një deklaratë për radiotelevizionin “Pink”, me seli në kryeqytetin Beograd të Serbisë, Aleksandar Vuçiç tha se pikëpamjet e tij personale për luftën ruso-ukrainase ndryshojnë nga pikëpamja zyrtare e shtetit serb, se Serbia nuk vendos sanksione ndaj Rusisë dhe se vendosja e sanksioneve do të rëndonte mbi parimet serbe.
“Rusia e ka mbështetur integritetin territorial të Serbisë që nga viti 2001. Pavarësisht nëse Serbia vendos sanksione ndaj Rusisë apo jo, kjo i kushton shtrenjtë Serbisë. Por besoj se ne do ta marrim gazin rus me një çmim më të volitshëm sesa vendet e tjera në Evropë”, theksoi ai.
Serbia, vend pothuajse tërësisht i varur nga gazi dhe nafta ruse, është kritikuar për shpalljen e neutralitetit në luftën e Rusisë ndaj Ukrainës dhe refuzimin e vendosjes së sanksioneve ndaj Moskës.
Vuçiç tërhoqi vëmendjen se efektet e luftës që filloi në Ukrainë më 24 shkurt (2022), do të ndihen për 3-4 vjet.
“Kjo luftë prek edhe Serbinë. Detyra jonë është të veprojmë në përputhje me të drejtën ndërkombëtare publike dhe të respektojmë parimet”, tha ai.
Presidenti Vuçiç takoi më parë të dërguarin rus, Aleksandar Bocan-Kharchenko dhe theksoi se Serbia, në rrugën e saj evropiane, do të vazhdojë të “ruajë miqësitë dhe partneritetet tradicionale me Rusinë dhe Kinën”.
Në këtë takim u diskutua për zhvillimin e mëtejshëm të marrëdhënieve Serbi-Rusi duke përfshirë edhe fushën e energjisë, me shpresën se së shpejti do të fillojnë bisedimet për sasitë, çmimet dhe kushtet e tjera të furnizimit me gaz.
Lideri serb iu përgjigj gjithashtu pretendimeve se armët që kanë blerë nga Kina janë të vjetra.
“I ftoj njerëzit tanë të shohin sistemet tona më moderne të mbrojtjes ajrore në Batajnicë, më 30 prill”, u shpreh Vuçiç mes të tjerash.
