Telefoni i Hanan Elatr u infektua me softuerin Pegasus.
Agjencia qeveritare e Emirateve të Bashkuara Arabe vendosi softuerin spiun të kompanisë izraelite NSO Group në telefonin e një personi të afërt me Jamal Khashoggi, vetëm disa muaj para se gazetari saudit të hiqej qafe, raportoi Washington Post.
Gazeta amerikane raportoi të martën se telefoni i të fejuarës së Khashoggi, Hanan Elatr (është një histori rozë e komplikuar mes këtij emri dhe Hatixhe Cingiz), ishte infektuar me softuerin spiun Pegasus ndërsa ajo ishte në paraburgim në Emiratet e Bashkuara Arabe në prill 2018.
Atë muaj, Elatr u ndalua me mbërritjen në aeroportin e Dubait, gjatë të cilit iu konfiskuan dy telefona celularë me sistem operativ Android dhe një laptop. Më pas u zbuluan edhe fjalëkalimet e saj, pas së cilës u mor në pyetje gjatë natës, pretendon Post.
Gazeta amerikane e kreu analizën me ndihmën e Bill Marczak, një ekspert i sigurisë kibernetike në Universitetin e Torontos, i cili po heton përdorimin e Pegasus dhe spyware të tjerë.
Marczak studioi dy telefonat që i kishte dhënë Elatr dhe zbuloi softuerin.
Khashoggi, një kolumnist i Washington Post dhe kritik i princit saudit të kurorës Mohammed bin Salman, u vra më 2 tetor 2018 në konsullatën saudite në Stamboll nga një ekip saudit.
Elatr tha se ajo dhe Khashoggi ishin martuar sipas zakoneve islame në qershor 2018.
Gjetjet e Washington Post janë shembulli më i fundit i përdorimit të softuerit NSO për qeveritë në mbarë botën përmes telefonave të gazetarëve të shquar, aktivistëve të të drejtave të njeriut dhe disidentëve.
Kompania izraelite ishte në shënjestër të grupeve të të drejtave të njeriut në fillim të këtij viti, pasi mediat ndërkombëtare zbuluan se forcat e sigurisë dhe qeveritë autoritare nga disa vende po përdornin Pegasus.
NSO pretendon se nuk ka bërë asgjë të keqe dhe se produktet e saj synojnë të ndihmojnë forcat e sigurisë në gjurmimin e kriminelëve dhe “terroristëve”. Qeveritë e akuzuara për përdorimin e softuerit, duke përfshirë Saudinë dhe Emiratet, kanë hedhur poshtë gjithashtu akuzat për abuzim.
Kompania izraelite ka qenë nën një presion të madh muajt e fundit dhe administrata e presidentit amerikan Joe Biden e futi në listën e zezë në nëntor.
Vrasja e Khashoggi ka ngjallur mosbesim në mbarë botën dhe ka kërkesa nga aktivistët e të drejtave të njeriut, organizatat e lirisë së medias, avokatët dhe ekspertët e Kombeve të Bashkuara për përgjegjësinë e autorëve.
Agjencitë e inteligjencës amerikane kanë arritur në përfundimin se Khashoggi u likuidua nga një ekip saudit që vepronte nën komandën e Bin Salman.
Por zyrtarët sauditë mohojnë se Bin Salman ka pasur një rol në ekzekutimine Khashoggi dhe hedhin poshtë gjetjet e agjencive të inteligjencës amerikane. /tesheshi.com/
