Presidenti ukrainas tha se duke refuzuar krijimin e një zone të ndaluar për fluturime, NATO ka dhënë “dritë jeshile për bombardimet e mëtejshme të qyteteve dhe fshatrave të Ukrainës”
Presidenti i Ukrainës Volodymyr Zelenskyy kritikoi vendimin e NATO-s të premten për të mos krijuar një zonë të ndaluar për fluturime mbi vendin e tij në vazhdën e luftës së saj me Rusinë, raporton Anadolu Agency (AA).
Zelenskyy e përshkroi takimin e së premtes të ministrave të jashtëm të NATO-s si “një samit i dobët dhe konfuz”.
“Të gjitha shërbimet e inteligjencës të vendeve të NATO-s janë të vetëdijshme për planet e armikut dhe se Rusia dëshiron të vazhdojë ofensivën. Për nëntë ditë ne kemi parë një luftë brutale; ata po shkatërrojnë qytetet tona, po bombardojnë njerëzit tanë, fëmijët tanë”, tha Zelenskyy në një deklaratë.
“Duke ditur se sulmet dhe viktimat e reja ishin të pashmangshme, NATO vendosi qëllimisht të mos mbyllte qiejt mbi Ukrainë”, shtoi ai.
Zelenskyy tha se duke refuzuar krijimin e një zone të ndaluar për fluturime, NATO ka dhënë “dritë jeshile për bombardimet e mëtejshme të qyteteve dhe fshatrave të Ukrainës”.
“Ne besojmë se vendet e NATO-s po krijojnë një fabul që duke mbyllur gjoja qiejt mbi Ukrainën për fluturim, ata do të provokojnë agresion të drejtpërdrejtë të Rusisë kundër NATO-s. Kjo është vetëhipnozë. Që sot, të gjithë ata që vdesin, vdesin për shkak tuajin”, shtoi ai.
