Presidenti amerikan Donald Trump të premten ndau një video, që sipas tij, tregon një sulm amerikan ndaj Huthëve në Jemen, ku shihet bombardimi i një grupi njerëzish të rreshtuar “në rreth”, në mënyrën tradicionale të mbledhjeve fisnore në Jemen.
Trump publikoi videon në platformën e tij Truth Social, ku shihet një grup burrash të qëndrojnë në rreth para se të goditen nga diçka që duket si një goditje precize.
“Këta Huthi ishin mbledhur për të marrë udhëzime për sulm. Ups, nuk do të ketë më sulm nga këta Huthi! Ata nuk do t’i fundosin më anijet tona!”, shkroi Trump.
Zyrtarët e Huthëve e mohuan pretendimin, duke thënë se mbledhja ishte një takim fisnor me qëllim zgjidhjen e mosmarrëveshjeve të brendshme dhe jo planifikim ushtarak. Ata akuzuan Trumpin për shtrembërim të ngjarjes dhe thanë se komentet e tij pasqyrojnë dështimet e shërbimeve amerikane dhe perëndimore të inteligjencës për Jemenin.
Herët të shtunën, Huthët pretenduan se kishin rrëzuar një dron Shark F360 të operuar nga SHBA dhe Izraeli mbi provincën veriore Saada, ku disa orë më parë ishin raportuar sulme ajrore amerikane.
SHBA ka nisur pothuajse sulme të përditshme ndaj objektivave të Huthëve që nga 15 marsi, si përgjigje ndaj sulmeve të vazhdueshme të grupit me raketa dhe dronë ndaj rrugëve detare në Detin e Kuq.
Megjithatë, një raport i CNN-it të premten mbrëma, duke cituar tre burime të njohura me operacionin, deklaroi se fushata kishte një “efekt të kufizuar” në aftësitë ushtarake të Huthëve.
Burimet thanë se SHBA ka shpenzuar pothuajse një miliard dollarë në më pak se tre javë dhe ka përdorur municione me vlerë qindra miliona dollarë, përfshirë raketa lundrimi dhe Tomahawk të drejtuara nga GPS-i. Thuhet se janë përdorur edhe bombarduesit B-2 që nuk kapen nga radarët, të dislokuar nga një bazë britanike në ishullin Diego Garcia në Oqeanin Indian.
Një burim i tha CNN-it se Pentagoni ka për qëllim të kërkojë fonde shtesë nga Kongresi për të vazhduar fushatën, edhe pse kritikat dypartiake mund ta bëjnë më të vështirë miratimin. Në një bisedë private që ka rrjedhur me gazetarin Jeffrey Goldberg dhe të tjerë, nënkryetari JD Vance vuri në pikëpyetje urtësinë e sulmeve, duke i quajtur ato potencialisht të gabuara.
Zyrtarët amerikanë i thanë ligjvënësve se disa udhëheqës të Huthëve janë vrarë dhe disa vende ushtarake janë dëmtuar, por se grupi ka ruajtur pjesën më të madhe të arsenalit të tij të armëve, duke i fshehur në bunkerë të nëndheshëm të fortifikuar, siç kanë bërë edhe në operacionet e mëparshme amerikane. Një zyrtar tha se ende është e vështirë të vlerësohet shkalla e plotë e arsenalit.
“Sulmet i kanë nxjerrë disa vende jashtë funksionit, por nuk kanë ndikuar në aftësinë e Huthëve për të qëlluar anijet në Detin e Kuq apo për të rrëzuar dronët amerikanë. Ndërkohë, ne po harxhojmë municione, karburant dhe kohë”, tha zyrtari.
Mbetet e paqartë se sa do të zgjasë fushata. Trump tha se sulmet do të vazhdojnë derisa Huthët të ndalojnë sulmet ndaj anijeve, ndonëse grupi vazhdon të lëshojë raketa dhe dronë.
Një zyrtar amerikan i sigurisë vuri në dukje një ulje të numrit të raketave të lëshuara ndaj Izraelit javën e kaluar dhe ia atribuoi sulmeve amerikane ndërprerjen e operacioneve të Huthëve, duke i detyruar shumë nga luftëtarët e tyre të fshihen.
