Administrata e Donald Trumpit po ushtron presion ndaj autoriteteve rumune që të heqin kufizimet e udhëtimit për vëllezërit Andrew dhe Tristan Tate, influencues të njohur dhe figura kontroverse në platformat online të së djathtës.
Vëllezërit Tate, të cilët kanë shtetësi amerikane dhe britanike, u arrestuan në Rumani në vitin 2022 nën akuzat për trafikim njerëzor, ngacmim seksual, pastrim parash dhe drejtim të një grupi të organizuar kriminal. Të dy mohojnë akuzat, ndërsa çështja e tyre ka tërhequr vëmendje të madhe në mediat e së djathtës.
Sipas burimeve, zyrtarët amerikanë kontaktuan qeverinë rumune javën e kaluar, ndërsa i dërguari i posaçëm i administratës Trump, Richard Grenell, e ngriti këtë çështje gjatë një takimi me ministrin e jashtëm rumun, Emil Hurezeanu, në Konferencën e Sigurisë në Mynih.
Grenell mohoi të kishte pasur një diskutim formal, por deklaroi se mbështet vëllezërit Tate, gjë që e ka konfirmuar edhe në postimet e tij publike në rrjetet sociale. Ai gjithashtu kritikoi atë që e quajti keqpërdorim të fondeve të USAID kundër “politikanëve antiglobalistë”.
Vëllezërit Tate, të cilët kanë miliona ndjekës në “manosferë” – një komunitet online që promovon superioritetin mashkullor dhe refuzon feminismin – janë kthyer në një simbol të rezistencës në qarqet e së djathtës. Andrew Tate është shpesh i njohur si një simpatizant i Trumpit, ndërsa Tristan Tate ka pohuar se ndikimi i tyre tek votuesit e rinj në SHBA dhe Evropë ka kontribuar në forcimin e pikëpamjeve të djathta.
Përveç procesit në Rumani, Mbretëria e Bashkuar kërkon ekstradimin e tyre për akuza të përdhunimit dhe trafikimit të qenieve njerëzore, ndërsa në SHBA ata përballen me një padi civile për gjoja detyrimin e një gruaje për të kryer punë seksuale. Së fundmi, ata shënuan një fitore ligjore në Rumani, pasi gjykata e apelit e ktheu çështjen e tyre për rishqyrtim nga prokuroria, por ende nuk u është lejuar të largohen nga vendi.
Kritikat ndaj Rumanisë kanë ardhur edhe nga nënkryetari amerikan JD Vance, i cili ka dënuar autoritetet rumune për anulimin e zgjedhjeve presidenciale në vend. Në dhjetor të vitit të kaluar, Gjykata Kushtetuese e Rumanisë vendosi të anulojë procesin zgjedhor për shkak të parregullsive të dyshuara, përfshirë një fushatë të sofistikuar në rrjetet sociale, që dyshohet se ishte koordinuar me Moskën.
Vance akuzoi Rumaninë se ka marrë këtë vendim nën presionin e madh të fqinjëve të saj evropianë. Kritikat u intensifikuan pasi zgjedhjet u fituan nga kandidati i krahut të djathtë, Călin Georgescu, i cili planifikon të kandidojë sërish në zgjedhjet e reja të majit. Vërejtjet e Vance ndaj politikës rumune janë interpretuar si mbështetje për politikanët e krahut të djathtë, të cilët kundërshtojnë ndikimin e globalistëve dhe akuzojnë BE-në për korruptimin e institucioneve demokratike.
