Përfaqësuesi i Partisë Social Demokratike të Gjermanisë (SPD) në pushtet, Adis Ahmetoviq, ka komentuar ngjarjet e fundit në veri të Kosovës, ku serbët etnikë kanë bllokuar rrugët dhe pikat kufitare për tre javë.
Ahmetoviq thekson se zhvillimi aktual i ngjarjeve ndërmjet Serbisë dhe Kosovës është shumë shqetësues, me mesazhin se “historia e errët nuk duhet të përsëritet”.
“Në vend të provokimeve të mëtejshme, për shembull duke i vendosur forcat serbe të sigurisë në gjendje të gatishmërisë së lartë luftarake ose duke bllokuar rrugët dhe pikat kufitare, duhet të ketë një vullnet të vërtetë për të negociuar për të parandaluar një konflikt të armatosur”, tha Ahmetoviq.
Ai shtoi se përkundër kërkesave ndërkombëtare, përfshirë një të kryeministrit të Kosovës Albin Kurti, i cili kërkoi nga KFOR-i që të heq barrikadat e arterieve kryesore të trafikut, ato ende janë të bllokuara, dhe pikat kufitare janë të mbyllura.
Ai tha se nëse informacioni është i saktë, njësitë e grupit Wagner tashmë janë të stacionuara në Serbi dhe kjo kërkon sqarim urgjent.
“Tani më shumë se kurrë, BE-ja dhe SHBA-ja janë thirrur të iniciojnë masa urgjente, konkrete për të parandaluar përshkallëzimin e mëtejshëm dhe për të siguruar paqen, për shembull përmes ringritjes së numrit të anëtarëve të KFOR-it, një mision ndërkombëtar që ka dëshmuar se të jetë një spirancë e stabilitetit në rajon”, tha ai.
Ai arriti në përfundimin se një përpjekje e qartë për të përsëritur një kapitull të errët në historinë e Ballkanit nuk duhet lejuar të ketë sukses.
