Rusia kishte planifikuar të kryente një operacion sabotues duke përdorur dronë dhe të sulmonte bazën ajrore të NATO-s që ndodhet në Geilenkirchen, Gjermani, sipas burimeve të inteligjencës gjermane që folën për agjencinë e lajmeve gjermane (DPA).
Ky objekt i NATO-s, i vendosur në Renaninë Veriore-Vestfali, ishte objektivi, gjë që shkaktoi shqetësim serioz në qarqet e sigurisë ndërkombëtare.
Javën e kaluar, baza ajrore e NATO-s në Geilenkirchen-Teveren u vendos në statusin “Charlie”, që është niveli i dytë më i lartë i gatishmërisë luftarake, për shkak të masave paraprake pas paralajmërimeve të shërbimit sekret amerikan për një sulm të mundshëm.
Të dhënat e inteligjencës treguan se ishte planifikuar një sulm i mundshëm me dronë ndaj bazës.
Për arsye të pa publikuara, Rusia e tërhoqi planin e saj. Për këtë arsye, masat e sigurisë të premten u ulën në “Bravo+”.
Burime nga shërbimi i inteligjencës gjermane konfirmuan se ishin marrë direktiva serioze nga shërbimi i inteligjencës që tregojnë për “veprime përgatitore për një sabotim të mundshëm rus kundër bazës së NATO-s, duke përfshirë përdorimin e dronëve”.
NATO e përdor Geilenkirchen që nga viti 1980 dhe e përdor atë si bazë për avionët e saj të zbulimit.
Në Geilenkirchen ndodhen 14 avionë Boeing E-3A Airborne Warning & Control System (AWACS), të pajisur me radar me rreze të gjatë dhe sensorë të aftë për të zbuluar objektivat ajrore dhe sipërfaqësore në distanca të mëdha.
Avioni E-3A mund të operojë në lartësi prej 9,150 metrash, duke mbuluar një zonë mbikëqyrjeje më të madhe se 300,000 kilometra katrorë.
