Mijëra protestues u mblodhën të shtunën në Washington dhe në mbarë Shtetet e Bashkuara, në kuadër të rreth 1.200 protestave që u paralajmëruan si vala më e madhe njëditore e rezistencës kundër presidentit Donald Trump dhe Elon Muskut, që nga nisja e reformave të shpejta të administratës shtetërore dhe zgjerimit të kompetencave presidenciale.
Protestat ishin një mundësi për kundërshtarët e Trumpit që të shprehnin qartë dhe masivisht pakënaqësinë e tyre ndaj një sërë vendimesh ekzekutive. Sipas faqes zyrtare të ngjarjes, deri në 150 organizata aktiviste raportuan pjesëmarrje. Demonstratat u mbajtën në të gjitha 50 shtetet e SHBA-së, por edhe në Kanada dhe Meksikë.
Terry Klein, një shkencëtare në pension nga Princeton, New Jersey, tha se kishte ardhur për të protestuar kundër politikave të Trumpit: “Që nga emigracioni, programi DOGE, tarifat e vendosura këtë javë, e deri te arsimi. E gjithë vendi është nën sulm – të gjitha institucionet që e bëjnë Amerikën atë që është.”
Numri i të pranishmëve u rrit gjatë ditës. Disa mbanin flamuj ukrainas, të tjerë ishin mbuluar me kefije palestineze dhe mbanin pankarta me mbishkrime si “Liri për Palestinën”, ndërsa kongresmenë demokratë kritikuan ashpër nga skena veprimet e Trumpit.
Wayne Hoffman, një këshilltar financiar në pension 73-vjeçar nga New Jersey, tha se ishte veçanërisht i shqetësuar për politikat ekonomike të Trumpit, sidomos për vendosjen e tarifave të gjera.
“Kjo do të kushtojë shumë fermerëve në shtetet republikane, dhe shumë do të humbasin vendet e punës dhe fondet e pensionit. Njerëzit tashmë kanë humbur dhjetëra mijëra dollarë,” tha ai.
Trump e kaloi ditën në Florida, duke luajtur golf në klubin e tij në Jupiter, dhe më pas u kthye në rezidencën Mar-a-Lago.
Me mbështetjen e Trumpit, ekipi i Muskut nga i ashtuquajturi “Ministria për Efiçencë të Qeverisjes” (DOGE) prej muajsh po kryen shkurtime drastike në administratën federale amerikane – janë pushuar mbi 200.000 punonjës nga gjithsej 2.3 milionë. Procesi, sipas burimeve, shpesh ka qenë i paorganizuar dhe kaotik, sa që në disa raste është dashur të rikthehen ekspertë kyç.
Vetëm një ditë më parë, Shërbimi i Tatimeve (IRS) filloi pushimin nga puna të mbi 20.000 të punësuarve – që përbën një të katërtën e fuqisë punëtore.
Të shtunën, qindra qytetarë u mblodhën edhe para selisë së Administratës për Sigurim Social, një nga objektivat kryesore të reformave DOGE, pranë Baltimorës. Protestuan kundër shkurtimeve të planifikuara që prekin të moshuarit dhe personat me aftësi të kufizuara.
Atmosfera ishte e tensionuar, plot zemërim dhe sfidë, pasi Administrata kishte njoftuar mbylljen e 7.000 vendeve të punës dhe shuarjen e shërbimit telefonik për miliona përdorues.
Zyrtarët e DOGE janë të pranishëm në atë ndërtesë prej javësh. Shumica e protestuesve ishin pensionistë, me pankarta ku shkruhej: “Ku është zhdukur shteti im?”, “Pushoni DOGE!”, “Dërgojeni Muskun në Mars!” dhe “Duart larg sigurimeve!”
Linda Falcao, e cila së shpejti mbush 65 vjeç, u tha të pranishmëve se ka kontribuar në fondin e sigurimeve shoqërore që nga mosha gjashtëmbëdhjetë vjeç.
“Jam e tmerruar, e zemëruar dhe e neveritur që diçka e tillë mund të ndodhë në Amerikë. E dua këtë vend, por më dhemb zemra. Kam nevojë për paratë e mia, dua atë që kam fituar – përfitimet e mia!”
Turma iu përgjigj me një zë: “Janë paratë tona!”
Nga Shtëpia e Bardhë erdhi një reagim. Zëvendës-zëdhënësja Liz Huston hodhi poshtë akuzat se Trump dëshiron të shkatërrojë sistemin e sigurimeve shoqërore dhe shëndetësore.
“Qëndrimi i presidentit Trump është i qartë – ai gjithmonë do të mbrojë Social Security, Medicare dhe Medicaid për ata që plotësojnë kushtet. Ndërsa demokratët duan t’i japin këto përfitime emigrantëve ilegalë, gjë që do të çonte në kolaps të sistemit dhe do të rrezikonte pensionistët amerikanë,” tha Huston përmes emailit.
Një pjesë e madhe e masave të Trumpit për momentin është ndalur përmes padive që pretendojnë se ai ka tejkaluar kompetencat – qoftë për pushime nga puna në administratë, deportime të emigrantëve apo heqjen e të drejtave për personat transgjinorë.
Që nga rikthimi i tij në pushtet më 20 janar, Trump nisi menjëherë një seri dekretesh që, sipas kritikëve, ndjekin planin e iniciativës konservatore “Projekti 2025”, që ka për synim centralizimin e pushtetit dhe ristrukturimin e institucioneve.
Përkrahësit e tij e përshkruajnë këtë qasje si një “tronditje të nevojshme” të sistemit dhe një përballje me strukturat liberale të ngulitura prej dekadash.
Paralelisht me protestat në SHBA, qindra amerikanë që jetojnë në Evropë u mblodhën në Berlin, Frankfurt, Paris dhe Londër – duke shprehur kundërshtimin e tyre ndaj kthesës drastike në politikën e brendshme dhe të jashtme të Amerikës.
