Bosnja dhe Hercegovina është një shtet i pavarur dhe sovran, integriteti territorial i të cilit nuk vihet në dyshim, theksuan anëtarët kryesorë të Parlamentit Evropian në një deklaratë të përbashkët.
Duke reaguar ndaj vendimit të Gjykatës së Bosnjës dhe Hercegovinës në rastin e Milorad Dodikut dhe Miloš Lukićit, raportuesi i përhershëm i Komisionit për Punë të Jashtme të Parlamentit Evropian për BiH, Ondřej Kolář (EPP, Çeki) dhe kryetari i Delegacionit të Parlamentit Evropian për marrëdhëniet me BiH dhe Kosovën, Davor Ivo Stier (EPP, Kroaci), theksuan rëndësinë e respektimit të institucioneve të BiH dhe pavarësisë së gjyqësorit të saj.
“Ne kemi marrë parasysh vendimin e Gjykatës së BiH, i cili i nënshtrohet procedurës së apelimit, dhe nënvizojmë rëndësinë e respektimit të plotë të institucioneve të BiH dhe pavarësisë së gjyqësorit të saj. Ne e konsiderojmë të papranueshëm presionin e paparë mbi gjyqësorin dhe frikësimin e gjyqtarëve para vendimit të sotëm”, thuhet në deklaratë.
Kolář dhe Stier rikujtuan mesazhet e qarta të dhëna ditët e fundit nga Delegacioni i BE-së në BiH, Zyra e Përfaqësuesit të Lartë, Misioni i OSBE-së në BiH dhe Bordi Drejtues i Këshillit për Zbatimin e Paqes.
“Ne i bëjmë thirrje të gjithë aktorëve në BiH që të tregojnë përmbajtje maksimale pas vendimit të sotëm dhe të përmbahen nga kërcënimet politike dhe veprimet e tjera të mundshme të dëmshme”, thuhet në njoftim.
Parlamenti Evropian ka kërkuar disa herë sanksione të synuara kundër aktorëve politikë që destabilizojnë BiH dhe rrezikojnë sovranitetin, integritetin territorial dhe rendin kushtetues të saj, duke përfshirë Milorad Dodikun, si dhe zyrtarë të tjerë të lartë të Republikës Sërpska dhe palë të treta që mbështesin politika separatiste.
“Në vend që të përhapë ndasi dhe të miratojë masa dhe ligje që qartë do të shkelin Kushtetutën e BiH, udhëheqësia e Republikës Sërpska duhet të përqendrohet në hapat urgjentë të nevojshëm për përparimin e BiH drejt Bashkimit Evropian”, përfundon deklarata.
