Është raportuar se Arabia Saudite dhe Katari kanë paguar së bashku borxhin prej rreth 15 milionë dollarësh të Sirisë ndaj Grupit të Bankës Botërore.
Sipas një deklarate të përbashkët të ministrive të financave të dy vendeve, në kuadër të përpjekjeve për të mbështetur rimëkëmbjen e ekonomisë siriane, është marrë përsipër shlyerja e borxhit të papaguar të Sirisë ndaj Grupit të Bankës Botërore.
E PAGUAN BORXHIN PREJ 15 MILIONË DOLLARËSH TË SIRISË
Në deklaratë u theksua se synohet të kontribuohet në ri-integrimin e Sirisë në sistemin ndërkombëtar financiar dhe në këtë kuadër është shlyer borxhi prej 15 milionë dollarësh.
DO TË HAPË RRUGËN PËR RIFILLIMIN E MBËSHTETJES NGA BANKA BOTËRORE
Kjo pagesë do të mundësojë që Grupi i Bankës Botërore të rifillojë pas 14 vitesh mbështetjen dhe aktivitetet e tij në Siri.
Gjithashtu, do të mundësojë që Siria të përfitojë financim dhe mbështetje teknike për sektorë emergjentë.
Këto fonde do të ndihmojnë në rindërtimin institucional, zhvillimin e kapaciteteve, reformat politike dhe përshpejtimin e përpjekjeve për zhvillim.
THIRRJE PËR RIFILLIM TË MENJËHERSHËM TË AKTIVITETEVE TË ZHVILLIMIT NË SIRI
Arabia Saudite dhe Katari i bënë thirrje institucioneve financiare ndërkombëtare dhe rajonale që të rifillojnë urgjentisht aktivitetet e zhvillimit në Siri, të shtojnë përpjekjet dhe të mbështesin çdo nismë që synon plotësimin e pritshmërive humane të popullit sirian.
Në deklaratë u theksua se këto hapa do të kontribuojnë në stabilitetin dhe mirëqenien e rajonit.
FMN JA KISHTE PARALAJMËRUAR KËTË
Kryetarja e Fondit Monetar Ndërkombëtar (FMN), Kristalina Georgieva, më 24 prill kishte deklaruar se synojnë të ndihmojnë Sirinë në rindërtimin e institucioneve të saj dhe përfshirjen e saj në ekonominë botërore.
Georgieva kishte bërë të ditur se gjatë Takimeve të Pranverës të FMN-së dhe Bankës Botërore, ishte zhvilluar një takim edhe me përfaqësues të Sirisë.
