Asamblisti i LDK-së në Podujevë, Ekrem Rrahmani, është lajmëruar në profilin e tij në “facebook” pas përplasjes që ka pasur me kryetarin e Komunës, Shpejtim Bulliqi, gjë për të cilën edhe është ndaluar nga Policia e Kosovës.
Rrahmani duke folur për incidentin e ndodhur në sallën e Kuvendit Komunal të Podujevës, ka thënë se janë të papranueshme dhe shton se as vetë nuk e ka menduar që pas më shumë se dy dekadash liri do të përballet me një situatë të tillë.
Asamblisti i LDK-së thotë se është e rrezikshme dhe e papranueshme mënyra se si kryetari i Podujevës po provon të mbajë peng punën e Kuvendit Komunal duke arrestuar njerëz vetëm pse e thonë të vërtetën.
Rrahmani ka akuzuar kryetarin e Podujeës për pazare të ulëta dhe tradhti.
Postimi i plotë:
Të dashur familjarë,
Të respektuar qytetarë të Komunës së Podujevës dhe mbarë Kosovës të cilët me keni shkruar e jeni interesuar për situatën e djeshme qe ndodhi në Kuvendin e Komunës së Podujevës,
Fillimisht dua të them se, pamjet e djeshme në Kuvendin e Komunës së Podujevës janë të papranueshme edhe për mua sepse asnjëherë nuk e kam menduar që do të përballem me situata të tilla në Podujevën e dy dekadave pas luftës. Por, përtej këtyre, unë jam Ekrem Rrahmani që me besimin e dhënë përmes votës, elektorati i LDK-së, qytetarët e Podujevës më besuan të jem zëri i tyre përfaqësues në Kuvendin Komunal.
Secili që më njeh e di që në secilin ambient ku veproj përballem me ata që duan të mashtrojnë e manipulojnë, e lëremë kur një i zgjedhur për kryetar komune tenton ta kontrabandojë vullnetin e qytetarëve të Podujevës duke marrë peng kuvendin dhe trupat e saj.
Është e papranueshme, e rrezikshme dhe neveritëse mënyra se si Bulliqi tenton të mbajë peng punën e kuvendit duke përdorur mekanizmat e shtetit për të arrestuar njerëz vetëm pse ia thonë në sy të vërtetën që mendojnë e shprehen ndryshe, e sidomos ata që për këtë punë kanë marrë mandat nga qytetari.
Unë Ekrem Rrahmani, deklarohem se ASNJËHERË, ASKUSH nuk mund të më ndal për të përfaqësuar drejt, me dinjitet e ndershmëri votuesin tim. Unë asnjë ditë të mandatit tim nuk do të hesht përballë një kryetari skandaloz që me pazare të ulëta e me tradhëti ka ardhë në atë pozitë dhe me format e njëjta po e ushtron atë detyrë sot e kësaj dite.
Kuvendi është vendi ku përfaqësohen qytetarët përmes asambleistëve të zgjedhur dhe secili që tenton të ndërhyjë, ta degradojë dhe ta keqpërdorë atë kuvend, përderisa jam anëtar i tij do të më ketë përballë.
Unë jam këtu për të mbrojtur interesat e votuesve të mi dhe për të siguruar që ne, LDK përfaqësojmë përgjegjshëm interesat e tyre. Tradhtarët që kanë braktisur sofrën që i rriti, ata që kanë shkelur besimin e qytetarëve tanë duhet të japin llogari dhe duhet të përballen me të vërtetë, ndërsa unë dhe LDK do të vazhdojmë të luftojmë gjithmonë për një qeverisje e udhëheqje të pastër e të drejtë, megjithëse këta të sotmit në pushtet nuk mund ta ofrojnë këtë!
Krejt në fund faleminderit secilit prej jush për gjithë mbështetjen! Do të jemi bashkë, sot e përherë!
KAQ PËR TASH!
