Sulmi erdhi në mes të breshërisë së raketave të lëshuara nga Libani drejt Izraelit verior
Ushtria izraelite sot kreu një seri sulmesh ajrore në Libanin jugor dhe rajonin Bekaa, raporton Anadolu.
Sirenat e sulmit ajror janë aktivizuar gjithashtu në Kiryat Shmona dhe disa vendbanime izraelite në Galilenë e Epërme, tha Radioja e Ushtrisë izraelite, duke shtuar se 25 raketa u hodhën nga Libani drejt Izraelit verior, duke shkaktuar disa zjarre, por pa viktima.
Sirenat gjithashtu bënë jehonë në rajonin Safed dhe në Brezin e Galilesë, duke sinjalizuar një përshkallëzim të konfliktit.
Kanali izraelit 12 raportoi se ushtria kreu sulmet në zonën e Lumit Litani thellë brenda Libanit, rreth 30 kilometra nga kufiri.
Ai shtoi se 45 raketa u hodhën nga Libani drejt disa vendbanimeve në Izraelin verior në më pak se një orë.
Një raketë e lëshuar nga Libani thuhet se goditi zonën Birya në Galilenë e Epërme, duke bërë që ushtria izraelite të mbyllte rrugët në veri të Lartësive të Golanit.
Nga ana tjetër, grupi libanez Hezbollah tha se hodhi raketa duke synuar disa objekte ushtarake izraelite.
“Shënjestruam qendrën e Batalionit 631 të Zbulimit, pjesë e Brigadës Golani, në bazën Ramot Naftali me raketa Katyusha”, tha Hezbollahu.
Grupi libanez deklaroi se kishte në shënjestër gjithashtu “lokacionin Jal Al-Alam me predha artilerie, duke e goditur atë drejtpërdrejt”.
Në një sulm të tretë, grupi synoi “bazën kyç të mbrojtjes ajrore të Komandës Veriore në bazën Birya me një breshëri raketash Katyusha”.
Në një sulm tjetër, Hezbollahu synoi “bazën Zar’it me armë raketore, duke e goditur atë drejtpërdrejt”.
E përditshmja izraelite Yedioth Ahronoth raportoi se avionët luftarakë izraelitë kryen më shumë se 100 sulme në ofenzivën e fundit në Libanin jugor.
Ndërkohë, ushtria izraelite njoftoi në X: “Aktualisht po shënjestrojmë pozicionet e Hezbollahut në Liban”.
Sipas medias shtetërore të Libanit, “armiku izraelit kreu dhjetëra sulme ajrore rreth qyteteve Sarira, Qatraneh, Shbail, Mahmoudiya dhe malin Rayhan në rrethin Jezzine”.
Avionët izraelitë shënjestruan gjithashtu zonën Ain al-Zarqa pranë Tiros dhe goditën periferinë e Marwahinit në rrethin Bint Jbeil.
Tensionet midis Izraelit dhe Hezbollahut janë intensifikuar ditët e fundit në mes të një përshkallëzimi ndërkufitar që nisi pas sulmeve të Izraelit në Rripin e Gazës më 7 tetor të vitit të kaluar.
