Kryetari i Partisë Demokratike, Lulzim Basha ka dalë në një konferencë për mediat pas protestës së zhvilluar sot në selinë e PD nga mbështetësit e ish-kryeministrit Sali Berisha. Para komunikimit me gazetarët, Basha ka zhvilluar një tur bashkë me mediat duke treguar dëmtimet brenda selisë së PD nga protesta.
Ai ka thënë se ishte paralajmëruar pushimi i selisë së PD me forcë. Ajo që nisi me pretekstin për një lëvizje demokratizuese, sipas Bashës, tregoi fytyrën e vërtetë të Berishës.
“Beteja e Sali Berishës nuk bëhet për askënd tjetër përveç vetes dhe në këtë betejë nuk kursen askënd”, u shpreh ai, raporton “Euronews Albania”.
Basha tha se “Berisha ka pasur sot, de fakto ditën e fundit politike në Shqipëri”.
Sipas tij, kjo është një mundësi për demokratët për t’u shkëputur njëherë e mirë nga “trashëgimia e tij e zezë”.
“Vula e kësaj tragjedia do të mbetet 8 janari”, deklaroi kreu i PD.
Basha tha se Berisha dhe kryeministri Edi Rama janë si dy vëllezër siamezë, ku njëri manipulon zgjedhjet dhe tjetri kërkon të përdorë PD për t’u mbrojtur.
“Po i bën shërbimin më të mirë Edi Ramës, që nuk e ka fshehur kënaqësinë e tij këto kohë”, ka deklaruar më tej ai.
Partia Demokratike është futur në krizë të thellë. Javë më parë, ish-kryetari Sali Berisha me një pjesë të partisë votuan për shkarkimin e Bashës në një mbledhje të cilësuar si “Kuvendi i Berishës”. Në referendum një numër i konsiderueshëm i anëtarëve të PD-së votoi pro shkarkimit. Në tentativën për t’u kthyer në selinë e partisë, ata hasën në rezistencë nga krahu i Bashës. Të shtunën, aty pos përplasjeve brenda partiake ndërhyri Policia. Pasi policia mori kontrollin, Berisha i dha fund protestës, por paralajmëroi vazhdimin e saj në ditët në vijim.
