Presidentja e Kosovës, Vjosa Osmani, konfirmoi mbrëmë se Kenia e ka njohur Kosovën si shtet të pavarur dhe sovran, me një vendim të nënshkruar nga presidenti William Ruto.
“Republika e Kosovës përshëndet vendimin e Republikës së Kenias për ta njohur Kosovën si shtet të pavarur dhe sovran, vendim i cili është nënshkruar nga presidenti Ruto dhe i është dërguar zyrtarisht Presidencës disa ditë më parë”, njoftoi Osmani.
Me këtë njohje, Kenia bëhet vendi i 105-të anëtar i Kombeve të Bashkuara që e njeh pavarësinë e Kosovës. Megjithatë, për shkak se Rusia dhe Kina – dy anëtare të përhershme të Këshillit të Sigurimit të OKB-së – nuk e njohin Kosovën, ajo ende nuk është anëtare e OKB-së.
Misioni i pasuksesshëm i Tamara Vuçiq
Njohja e Kosovës vjen disa muaj pas një ofensive diplomatike të Serbisë për ta parandaluar atë. Në tetor të vitit të kaluar, Tamara Vuçiq, bashkëshortja e presidentit serb Aleksandar Vuçiq, u dërgua në Nairobi si pjesë e kësaj fushate diplomatike serbe.
Vizita e saj nuk ishte njoftuar paraprakisht, gjë që nxiti spekulime se qëllimi i udhëtimit ishte pikërisht lobimi kundër njohjes së Kosovës. Bashkëshortja e Vuçiqit zhvilloi takime me kryeministrin kenian Musalia Mudavadi dhe ministrin e punëve të jashtme, duke theksuar forcimin e marrëdhënieve dypalëshe dhe bashkëpunimit ekonomik mes Serbisë dhe Kenias.
Përveç bisedimeve diplomatike, Serbia premtoi ndihmë financiare për Keninë, përfshirë një donacion prej 150 mijë euro për viktimat e përmbytjeve. Vuçiq gjithashtu vizitoi lagjen e varfër Mukuru në Nairobi, ku përcolli një “mesazh vullneti të mirë” nga presidenti serb.
Në Kenia, bashkëshortja e Vuçiqit kërceu edhe me gra lokale.
Pavarësisht këtyre përpjekjeve, vendimi për njohjen e Kosovës u mor dhe Kenia u bë shteti më i fundit që mbështet pavarësinë e Kosovës.
Reagimi i Serbisë
Ministria e Punëve të Jashtme të Serbisë dënoi ashpër vendimin e Kenias, duke e quajtur “shkelje të rëndë të së drejtës ndërkombëtare” dhe “cënim të drejtpërdrejtë të Rezolutës 1244 të Këshillit të Sigurimit të Kombeve të Bashkuara”.
“Ovakva odluka podriva napore usmjerene ka konstruktivnom dijalogu, regionalnoj stabilnosti i poštovanju međunarodno-pravnog poretka. Također predstavlja žalostan presedan u tradicionalno prijateljskim odnosima između Srbije i Kenije”, thuhet në deklaratë.
