Bashkimi Evropian ka një plan të fuqishëm për të kundërpërgjigjur ndaj tarifave doganore të vendosura nga presidenti amerikan Donald Trump, por do të preferonte negociata, deklaroi presidentja e Komisionit Evropian, Ursula von der Leyen.
Trump, që nga 2 prilli, ka kërcënuar me tarifa të larta për të gjithë mallrat e importuara nga pjesë të ndryshme të botës. Administrata e tij tashmë në mars ka vendosur tarifa për çelikun dhe aluminin, dhe ka njoftuar se tarifat për makinat do të hyjnë në fuqi të enjten.
Duke folur të martën në Parlamentin Evropian, von der Leyen tha se sektorët e ardhshëm që do të goditen nga tarifat janë: gjysmëpërçuesit, produktet farmaceutike dhe druri.
Ajo theksoi se shumë qytetarë evropianë janë ndjerë “plotësisht të dëshpëruar” nga njoftimet amerikane.
“Evropa nuk e ka nisur këtë konfrontim. Ne nuk duam të hakmerremi, por nëse është e nevojshme, kemi një plan të fuqishëm për kundërmasa dhe do ta përdorim atë”, deklaroi von der Leyen.
Pa zbuluar detaje, ajo tha se “të gjithë instrumentet janë mbi tryezë”, duke përfshirë të gjitha kundërmasat e mundshme.
“Evropa ka shumë karta në dorë – nga tregtia, te teknologjia, deri te madhësia e tregut tonë. Por kjo forcë bazohet edhe në gatishmërinë tonë për të ndërmarrë masa të forta kur është e nevojshme,” shtoi ajo.
Pas vendosjes së tarifave për çelikun dhe aluminin në mars, Komisioni Evropian kishte paralajmëruar kundërmasa mbi mallra amerikane në vlerë deri në 26 miliardë euro.
Zyrtarët e BE-së nuk e kanë përjashtuar mundësinë e masave ndëshkuese ndaj shërbimeve amerikane, siç do të ishte pezullimi i të drejtave të pronësisë intelektuale. Në teori, hakmarrja mund të drejtohet ndaj kompanive amerikane të teknologjisë, bankave dhe ofruesve të shërbimeve financiare. /Gazetaere
