Ish-kryeministri i Shqipërisë, Sali Berisha, ka folur për heqjen e embargos së naftës ndaj Serbisë në kohën e luftës në Kosovë.
Ai tha se e mori këtë vendim sepse penalizonte Kosovën dhe pothuajse fare Beogradin. Berisha u shpreh në RTK se embargoja bëri që toka në Kosovë të mbetej pa punuar pasi çmimi i punimit të tokës ishte më i lartë se fitimi nga prodhimet.
“E vërteta është që qeveria shqiptare e Berishës ishte e vetmja që kërkonte heqjen e embargos sepse penalizonte Kosovën dhe pothuajse fare Beogradin. Naftën e kontrollonte Beogradin. Naftën e merrte nga Danubi. Në Kosovë 40-50% e tokës mbeti dierr. Nuk e punonin më. Sepse shkoi çmimi i punimit më i lartë se fitimi nga prodhimet. Të gjithë krizën e naftës e përjetonte Kosova. Nuk desha që kjo krizë e naftës të binte mbi Kosovën. Kosova kishte tokë pjellore. Unë kërkoja publikisht heqjen e Embargos. Raportet e OKB tregojnë se 96% të naftës Serbia e merrte nga Danubi. Për të zbatuar ligjin ndërkombëtar. Sali Berisha ka bërë gjithçka”.
“A kishte shkelje? Natyrisht që po. Zonat kufitare tregtonin naftë me mushka dhe gomarë. A mund të urdhëroja unë zonat kufitare të vrisnin një person për një bidon naftë? Nuk mund të pranoj unë që të qëllohet për një bidon naftë. Nuk kanë qenë vetëm këto. Nëse shkelje e embargos quhet transportimi i naftës me mushka dhe gomarë, ky është slogan i enveristëve. Ngarkesa të tëra me barut i janë dhënë Bosnjës dhe Kroacisë, në dy vende për luftë kundër Serbisë. Është vendi që ka ndihmuar falas me materiale ushtarake. Kishte një lloj akordi. Qëndrimi ndaj luftës ka qenë më i ashpri kundër Serbisë. Nuk e ndjej fare. Duke kundërshtuar embargon që ndëshkonte Kosovën kam zbatuar ligjin ndërkombëtar. Nuk kam urdhëruar të qëllohen fshatarë për një bidon naftë. Kam urdhëruar të kapen por jo të qëllohen. Sali Berisha ka dhënë një kontribut në luftën kundër Serbisë duke dërguar armatimet në Bosnjë dhe Kroaci”, deklaroi Berisha.
