“Hunter u veçua vetëm sepse ai është djali im, dhe kjo është e gabuar”, tha presidenti amerikan Joe Biden
Presidenti i SHBA-së, Joe Biden mbrëmë zyrtarisht shpalli falje për djalin e tij, Hunter Biden, pasi ai u dënua për armë dhe shmangie të taksave, ndonëse presidenti më parë u zotua se nuk do të përdorte fuqitë e tij ekzekutive, raporton Anadolu.
Biden në një deklaratë të gjatë tha se akuzat kundër djalit të tij ishin të motivuara politikisht, duke shtuar se “përplasja politike ka infektuar” sistemin e drejtësisë dhe ka rezultuar në një “shkelje të drejtësisë”.
“Asnjë person i arsyeshëm që shikon faktet e rasteve të Hunterit nuk mund të arrijë ndonjë përfundim tjetër përveç se Hunter u veçua vetëm sepse ai është djali im, dhe kjo është e gabuar. Ka pasur një përpjekje për të thyer Hunterin, i cili për pesë vite e gjysmë ka qenë i matur, edhe përballë sulmeve të pandërprera dhe ndjekjes selektive”, tha presidenti amerikan, duke shtuar:
“Në përpjekjen për të thyer Hunterin, ata janë përpjekur të më thyejnë mua, dhe nuk ka asnjë arsye për të besuar se kjo do të ndalet këtu. Mjaft është mjaft”.
Hunter Biden u shpall fajtor për akuza federale për armë të lidhura me posedimin e tij të një arme zjarri teksa ishte i varur nga droga në vitin 2018. Përpos kësaj, ai u shpall fajtor për akuzat federale të taksave në shtator.
Falja presidenciale përfshin të dyja dënimet dhe është një ndryshim i madh në krahasim me zotimet e presidentit se nuk do ta bënte këtë. Biden është planifikuar të largohet nga SHBA-ja për një udhëtim në Afrikë, ku nuk do të përballet me gazetarët për disa ditë.
