Pas ndërprerjes së seancës konstituive të Kuvendit të Kosovës, reagimet politike nuk kanë munguar. Eugen Cakolli nga Instituti Demokratik i Kosovës (KDI) ka shprehur shqetësim për shkeljet procedurale dhe bllokimin institucional që po e përcjell procesin e konstituimit.
“Ndërprerja e seancës pa votim formal dhe pa përfunduar rendin e ditës përbën shkelje procedurale”, tha Cakolli, duke akuzuar kryesuesin Avni Dehari për menaxhim të papërshtatshëm të seancës. Ai shtoi se mungesa e dorëheqjeve nga kryeministri dhe 15 ministrat që kanë fituar mandat si deputetë po e bllokon funksionimin e Kuvendit dhe kërkoi që këto dorëheqje të jepen menjëherë, në përputhje me ligjin.
Albulena Haxhiu nga Lëvizja Vetëvendosje deklaroi se nuk u arrit një zgjidhje për konstituimin e Kuvendit dhe e quajti të paqartë situatën ligjore, ndërsa theksoi gatishmërinë e partisë së saj për të diskutuar opsione. Edhe Mimoza Kusari nga VV kritikoi opozitën për, siç tha ajo, “shterrje të formave kreative të opozitarizmit” dhe për bllokim të qëllimshëm të procesit.
Në anën tjetër, partitë opozitare LDK dhe PDK reaguan ashpër ndaj zhvillimeve. LDK në një komunikatë e akuzoi Vetëvendosjen për bllokim të qëllimshëm dhe shkelje të Rregullores së Kuvendit, ndërsa theksoi se ekzistonte kuorum për të vazhduar punimet. Kryetari i PDK-së, Memli Krasniqi, tha se Vetëvendosje organizoi një “kaos të qëllimshëm” për të shtyrë votimet dhe për të fituar kohë për “pazare politike”.
Kryetari i LDK-së, Lumir Abdixhiku, e quajti ndërprerjen e seancës “praktikë të mbrapshtë” dhe theksoi se ishte e padrejtë ndërprerja e seancës kur kishte kuorum për votim.
Kuvendi i Kosovës vazhdon të jetë i paralizuar, me thellim të përplasjes politike mes pushtetit dhe opozitës, dhe pa një zgjidhje të qartë për konstituimin e tij.
