Anëtarë të rinj të Presidencës janë Zhelka Cvijanoviç, Zhelko Komshiç dhe Denis Beqiroviq.
Në Sarajevë u mbajt seanca konstituive e Presidencës së Bosnje e Hercegovinës (BeH), ku Zhelka Cvijanoviç, Zhelko Komshiç dhe Denis Beqiroviq u betuan si anëtarë të rinj të këtij institucioni, raporton Anadolu Agency (AA).
Ceremonia solemne filloi me intonimin e himnit kombëtar të BeH-së, ndërsa më pas, ish-kryetari i Presidencës së BeH-së, Shefik Xhaferoviq, hapi seancën konstituive ku u bë dorëzimi i detyrave.
Pas kësaj, kryetari i Komisionit Qendror të Zgjedhjeve të BeH-së, Suad Arnautoviq, u dorëzoi certifikatat anëtarëve të porsazgjedhur të Presidencës së BeH-së.
Pas kësaj, anëtarët e porsazgjedhur lexuan dhe nënshkruan tekstin e deklaratës solemne, përkatësisht bënë betimin.
Me dhënien e betimit solemn, Zhelka Cvijanoviç, e cila do të jetë kryetare në tetë muajt e ardhshëm sipas sistemit të rotacionit, si dhe anëtarët e Presidencës së BeH-së, Zhelko Komshiç dhe Denis Beqiroviq, morën detyrën e kreut kolektiv të shtetit për katër vitet e ardhshme.
Në ngjarjen solemne, përveç anëtarëve të Presidencës së BeH-së, morën pjesë edhe anëtarë të familjeve të tyre, përfaqësues të trupit diplomatik, kryetarë të partive të caktuara politike dhe zyrtarë të tjerë.
Anëtarët e rinj të Presidencës së BeH-së janë përbërja e tetë e këtij institucioni që nga viti 1996, kur u mbajtën zgjedhjet e para të pasluftës.
Në mandatin e kaluar, funksionet e anëtarëve i kryenin Shefik Xhaferoviq, Zhelko Komshiç dhe Milorad Dodik.
Në zgjedhjet e përgjithshme në Bosnje dhe Hercegovinë të mbajtura në tetor të këtij viti, anëtarë të Presidencës së Bosnjë-Hercegovinës u zgjodhën Beqiroviq nga kombi boshnjak, Komshiç nga kombi kroat dhe Cvijanoviç nga kombi serb.
Denis Beqiroviq fitoi 330.238 vota, Zhelka Cvijanoviç fitoi 327.720 vota, dhe Zhelko Komshiç 227.540 vota.