Georgi Svilenski, kreu i grupit parlamentar të BSP-së, tha se partia nesër do të informojë presidentin Rumen Radev, i cili pritet të shpërndajë parlamentin dhe të caktojë një datë për zgjedhjet, me shumë gjasa në muajin tetor
Bullgaria shkon drejt zgjedhjeve të parakohshme këtë vjeshtë pasi Partia Socialiste Bullgare (BSP) dështoi në formimin e qeverisë në përpjekjen e tretë dhe të fundit për të zgjidhur krizën politike në vazhdim, raporton Anadolu Agency (AA).
Georgi Svilenski, kreu i grupit parlamentar të BSP-së, tha se partia nesër do të informojë presidentin Rumen Radev, i cili pritet të shpërndajë parlamentin dhe të caktojë një datë për zgjedhjet, me shumë gjasa në muajin tetor.
Zgjedhjet e ardhshme të parakohshme do të jenë zgjedhjet e katërta në dy vitet e fundit në Bullgari, vend që është dëmtuar nga paqëndrueshmëria politike që kur qeveria e kryeministrit Kiril Petkov u rrëzua në një votë mosbesimi muajin kaluar.
Njoftimi i Svilenskit erdhi pasi një votim parlamentar mbi një plan të qeverisjes, i hartuar nga BSP-ja, partia e ish-kryeministrit Petkov, Vazhdojmë me Ndryshimin (PP) dhe Bullgaria Demokratike, u anulua.
Votimi u kundërshtua nga koalicioni i ish-partisë në pushtet GERB dhe Unioni i Forcave Demokratike.
Javën e kaluar, presidenti Radev e angazhoi BSP-në të formojë një qeveri, pas përpjekjes së dështuar nga PP-ja në fillim të këtij muaji dhe refuzimit të koalicionit midis GERB-it dhe Unionit të Forcave Demokratike pasi iu dorëzua mandati më 14 korrik.
