Protestat e mëdha të studentëve në bllokadë do të mbahen sot në Beograd, ndërsa presidenti i Serbisë, Aleksandar Vuçiq, pretendon se synimi i tyre është të nxisin një luftë civile dhe të marrin pushtetin me dhunë.
Sa i përket protestave të sotme, studentët kanë publikuar planin dhe vendndodhjet ku do të lëvizin në Beograd.
Të mbledhurit do të nisen nga disa pika të ndryshme në Beograd në orën 13:00, ndërsa është planifikuar që të gjithë të takohen në orën 16:00 përpara ndërtesës së Kuvendit Popullor të Republikës së Serbisë.
Si filloi gjithçka?
Studentët që janë në bllokadë që nga fundi i vitit të kaluar filluan protestat pas shembjes së Stacionit Hekurudhor në Novi Sad, ku humbën jetën 15 persona.
Që atëherë, ata janë mbledhur në numër të madh në të gjithë Serbinë, veçanërisht në Beograd, Novi Sad, Kragujevc dhe disa qytete të tjera.
Për sot janë paralajmëruar protestat më të mëdha deri tani në Beograd, ku do të marrin pjesë studentë nga e gjithë Serbia. Kolonat e studentëve nga Serbia Perëndimore, Qendrore dhe Jugore janë nisur drejt Beogradit në këmbë dhe me biçikleta. Ata u pritën të premten në mbrëmje në Terazije në Beograd. Gjatë rrugës, morën mbështetje nga shumë qytetarë të vendeve që kaluan. Të gjithë do të mblidhen të shtunën në mesditë në vende të ndryshme në Beograd dhe do të arrijnë para Kuvendit të Serbisë në orën 16:00.
Studentët e Beogradit, të cilët janë organizatorët e protestës, kanë ofruar strehim falas për kolegët e tyre nga qytetet e tjera që do të jenë sot me ta para Kuvendit të Serbisë. Prej ditësh, përmes rrjeteve sociale, ata kanë ofruar shtëpi, dhoma, apartamente dhe strehime të tjera private. Nga ana tjetër, qytetarë të tjerë kanë njoftuar ndihmë në përgatitjen dhe shpërndarjen e ushqimit.
Ndërkohë, përpara Presidencës së Serbisë, në Parkun Pionir, janë mbledhur “studentët që duan të mësojnë”. Ata kanë paraqitur pesë kërkesa, ndër të cilat është edhe përcaktimi i afateve për rikthimin në auditorë. Gjatë disa momenteve të mbledhjes së tyre, ata kanë akuzuar “studentët në bllokadë” se i kanë sulmuar fizikisht dhe i kanë fyer.
Në anën e tyre është edhe presidenti i vendit, Aleksandar Vuçiq, i cili thotë se “studentët që duan të mësojnë” po përjetojnë dhunë fizike dhe verbale, por nuk po përgjigjen me të njëjtën mënyrë.
“Ata janë fajtorë vetëm sepse duan të mësojnë,” ka thënë Vuçiq disa herë.
Ai i priti ata të enjten në mbrëmje në Presidencë dhe i kërkoi që të shkonin në shtëpitë e tyre para protestave të sotme për të shmangur ndonjë sulm ndaj tyre. Megjithatë, ata më vonë deklaruan se do të qëndrojnë në Parkun Pionir.
Vuçiq pretendon se protestuesit do të nxisin luftë civile
Vuçiq ka pohuar se protestuesit e sotëm do të përpiqen të shkaktojnë një luftë civile dhe të marrin pushtetin me dhunë. Madje ai deklaroi se do të qëndrojë në Presidencë gjatë protestave dhe se nëse dikush dëshiron të marrë pushtetin me dhunë, do të duhet ta vrasë atë.
Paralajmërime për një luftë civile ka bërë edhe kryetarja e Kuvendit, Ana Brnabiq, e cila është mbështetur në disa video ku pretendohet se shihen përfaqësues të partive politike, organizatave joqeveritare dhe “ata që fshihen pas plenumeve studentore”. Ajo ka pohuar se ata kanë planifikuar për ditë të tëra një “grusht shteti, dhunë dhe vrasjen e Aleksandar Vuçiqit”. Për këtë, ajo ka kërkuar një reagim urgjent nga institucionet përgjegjëse.
Pretendimet e Vuçiqit
“Unë e di se si paguajnë për të ardhur në Beograd në mitingje, e di se si grumbullohen dhe shpërndahen këto para, dhe e di si vidhen ato. Për çdo koment në qendrat rajonale, për çdo gjë – transporti, dieta, ushqimi – gjithçka paguhet. Unë ju pyes, kush i paguan këto? A mendoni me të vërtetë se shërbimet e kësaj vendi nuk funksionojnë dhe nuk e dimë se sa paguhet?” ka thënë Vuçiq.
Duke qenë se Vuçiq ka deklaruar se opozita do të organizojë dhunë gjatë protestave në Beograd, ata i janë përgjigjur duke thënë se ai do të jetë përgjegjësi i vetëm për çdo incident të mundshëm.
“Ai (Vuçiq) po krijon një realitet paralel dhe tani po përpiqet të shkaktojë trazira dhe incidente, ashtu siç bëri me bandat e tij të maskuara gjatë trazirave në Beograd dhe Novi Sad. Qytetarët e Serbisë nuk kanë grupe të maskuara që rrahin njerëzit, këtë e ka vetëm Vuçiqi. Ai është ai që po përpiqet me çdo mënyrë të shkaktojë incidente, ai duke folur për kundër-revolucion po nxit dhunën”, ka thënë kryetari i Lëvizjes Popullore të Serbisë, Miroslav Aleksiq.
Opozita pretendon se nuk janë ata organizatorët e protestave, por vetëm studentët, dhe theksojnë se deri më tani janë mbajtur shumë protesta dhe asnjëherë nuk ka pasur dhunë.
Vuçiq e ka bazuar pretendimin e tij se do të ketë dhunë edhe në skenat e fundit në Kuvendin e Serbisë, ku janë përdorur flakadanë dhe shpërthime, duke plagosur disa deputetë.
Një ditë para protestave të sotme, përpara Presidencës së Serbisë janë vendosur dhjetëra traktorë të sjellë nga pjesë të ndryshme të vendit dhe pa targa regjistrimi.
Ekspertët e sigurisë besojnë se këto traktorë janë vendosur për të rritur presionin dhe për të shkaktuar frikë nga radikalizimi i protestave, në mënyrë që në rrugë të dalin sa më pak njerëz./Gazetaere
