Personazhet e famshëm që promovojnë brende dhe produkte të ndryshme nuk janë aspak diçka e panjohur, dhe dihet se shumë prej tyre marrin shuma marramendëse për këtë. Faqja në Instagram “Wealth” ka publikuar se kush ndodhet në krye të listës, dhe disa prej tyre kërkojnë deri në 3 milionë dollarë për vetëm një postim në Instagram.
Në fakt, postimi i faqes “Wealth” rendit disa nga yjet më të mëdhenj të kohës sonë, të cilët njëkohësisht janë edhe ndër më të ndjekurit në Instagram, dhe tregon se sa kushton një postim i vetëm në profilin e tyre.
Në “fundin” e listës ndodhet Justin Bieber me 295 milionë ndjekës, dhe një postim në profilin e tij kushton 1.7 milionë dollarë. Khloe Kardashian, njëra nga motrat “më pak të njohura” të familjes Kardashian, kërkon 1.8 milionë dollarë për një postim – po aq sa kërkon edhe Beyonce, e cila ka 312 milionë ndjekës në Instagram.
Në listë ndodhet edhe Kim Kardashian me 357 milionë ndjekës dhe një çmim prej 2.1 milionë dollarësh për një postim; gjithashtu edhe Ariana Grande – 2.26 milionë, Dwayne Johnson “The Rock” – 2.32 milionë, Kylie Jenner – 2.38 milionë, dhe Selena Gomez që kërkon 2.55 milionë dollarë për një postim.
Në krye të listës janë superyjet e futbollit Leo Messi dhe Cristiano Ronaldo, të cilët për një postim në Instagram kërkojnë përkatësisht 2.59 milionë dhe 3.23 milionë dollarë.
Sa kushtojnë zakonisht postimet e sponsorizuara në Instagram?
Bazuar në sondazhet e influencerëve në Instagram, Shopify raporton se një postim i sponsorizuar kushton mesatarisht rreth 1.300 dollarë.
Shumat e vlerësuara ndahen si më poshtë:
- Nano-influencerët (500–10.000 ndjekës): 10 deri në 100 dollarë për postim
- Mikro-influencerët (10.000–50.000 ndjekës): 100 deri në 500 dollarë për postim
- Influencerët e rangut të mesëm (50.000–100.000 ndjekës): 500 deri në 5.000 dollarë për postim
- Makro-influencerët (100.000–500.000 ndjekës): 5.000 deri në 10.000 dollarë për postim
- Mega-influencerët (500.000+ ndjekës): 10.000 dollarë ose më shumë për postim
Sipas të dhënave të fundit nga rrjetet sociale, kërkesa për mikro dhe meso-influencerë është rritur, ndërsa ndikimi i mega-influencerëve ka rënë në vitet e fundit.
Influencerët më të vegjël shpesh janë të specializuar për përmbajtje të përshtatur për një audiencë të caktuar, gjë që mund të jetë shumë e vlefshme për brendet.
